خیبرپختونخوا حکومت کا 9 مئی واقعے سے متعلق مقدمہ واپس لینے کا فیصلہ

خیبرپختونخوا کی صوبائی کابینہ نے مردان میں 9 مئی کو پیش آنے والے ہنگامہ آرائی اور فائرنگ کے واقعے سے متعلق درج مقدمے کی واپسی کی منظوری دے دی ہے۔

صوبائی حکومت نے اس ضمن میں پبلک پراسیکیوٹر کا تبادلہ کر کے ایڈیشنل ایڈووکیٹ جنرل انعام اللہ کو اس کیس کے لیے خصوصی پراسیکیوٹر مقرر کیا ہے۔

ایڈیشنل ایڈووکیٹ جنرل نے مقدمہ واپس لینے کی درخواست سے متعلق ایڈیشنل ہوم سیکرٹری کا خط عدالت میں جمع کروا دیا، جس کے بعد عدالت نے کیس کی آئندہ سماعت 15 اکتوبر کو مقرر کر دی۔

یاد رہے کہ 9 مئی کے روز مردان میں احتجاج کے دوران پتھراؤ اور فائرنگ کے واقعات پیش آئے تھے، جن میں کارکنوں، راہگیروں اور پولیس اہلکاروں کو چوٹیں آئی تھیں۔ اس مقدمے میں ایم این اے مجاہد خان، ظاہر شاہ طورو اور دیگر افراد کو نامزد کیا گیا تھا۔