پنجاب حکومت کا پانچ اضلاع میں 26جولائی سے گھر گھرکورونا ویکسینیشن مہم شروع کرنے کا فیصلہ

تفصیلات کے مطابق کورونا ویکسینیشن مہم کا فیصلہ صوبائی وزیر صحت ڈاکٹر یاسمین راشد اور چیف سیکرٹری پنجاب کی زیر صدارت اجلاس میں کیا گیا ہے ،این سی او سی نے 14اگست تک پنجاب کے ان پانچ اضلاع کے18سال سے زائد عمر افراد کی 40فیصد آبادی کو ویکسیئن لگانے کا ہدف دیاہے ،لاہور میں ڈرائیو تھرو ویکسینیشن سینٹرز میں اضافہ بھی کیا جائے گا ۔

ڈاکٹر یاسمین راشد کا کہنا تھا کہ کورونا سے بچاؤ کا واحد حل ویکسینیشن اورایس او پیز پر عمل ہے،این سی او سی کی جانب سے دیئے گئے  ویکسینیشن کے اہداف کو پورا کیا جائے گا ، گھر گھر ویکسینیشن کیلئے موبائل ٹیمیں تشکیل دی جائیں گی۔ شہری ویکسیئن لگوانے کیساتھ ساتھ احتیاطی تدابیر پر عمل بھی جاری رکھیں ۔

سیکرٹری پرائمری ہیلتھ کا اجلاس کے شرکا کو بریفنگ دیتے ہوے کہنا تھا کہ محکمہ صحت نے خصوصی ویکسینیشن مہم کیلئے مائیکرو پلان تیار کر لیا ہے ،گھر گھر جا کر ویکسیئن لگانے کیلئے ہر یونین کونسل میں دو موبائل ٹیمیں تشکیل  دی جائیں گی،فیصل آباد میں 566، گوجرانوالہ میں 224،ملتان میں 250موبائل ٹیمیں قائم کی جائیں گی ،راولپنڈی میں 356 اورلاہور میں 528موبائل ٹیمیں تشکیل دی جائیں گی۔

اجلاس میں ایڈیشنل چیف سیکرٹری داخلہ، سینئر ممبر بورڈ آف ریونیو، سیکرٹری سپیشلائزڈ ہیلتھ ،ڈپٹی کمشنر لاہور،ڈی جی پی ڈی ایم اے، ڈی جی پی آر اور متعلقہ افسران نے شرکت کی ہے۔ جبکہ فیصل آباد، گوجرانوالہ، ملتان اور راولپنڈی کے کمشنرز اور ڈپٹی کمشنرز ویڈیو لنک کے ذریعے اجلاس میں شریک ہوئے۔