سعودی عرب کا اعلیٰ سطح کا وفد پاکستان پہنچ گیا،مختلف معاہدوں اور مفاہمتی یادداشتوں پر دستخط متوقع

اسلام آباد:پاک سعودی تاریخی دفاعی معاہدے کے بعد ایک اور بڑی اہم پیشرفت ہوئی ہے،جس کے تحت سعودی عرب کا اعلیٰ سطح کا وفد پاکستان پہنچ گیا۔
تفصیلات کے مطابق شہزادہ منصور بن محمد السعود کی سربراہی میں وفد اسلام آباد پہنچا ہے۔

اسلام آباد آمد پر سیکرٹری ایس آئی ایف سی جمیل قریشی،پاکستان میں سعودی سفیر نواف بن سعید المالکی،سعودی عرب میں پاکستان کے سفیر احمد فاروق نے وفد کا استقبال کیا،وفد کی پاکستان میں وزیراعظم سمیت اہم شخصیات سے ملاقاتیں شیڈول ہیں۔

دورہ کا مقصد دونوں ملکوں کے درمیان تجارت، سرمایہ کاری اور اقتصادی تعاون کو فروغ دینا ہے۔ دورے کے دوران وفد مختلف کاروباری حلقوں سے ملاقاتیں کرے گا اور ممکنہ مشترکہ منصوبوں پر بات چیت ہوگی۔

اس  دوران سعودی سرمایہ کاروں کو پاکستان میں سرمایہ کاری کے مواقع سے روشناس کرانا اور دوطرفہ کاروباری شراکت داری کو مزید مستحکم کرنا ہے۔اس دورے کے دوران معاہدوں اور مفاہمتی یادداشتوں پر دستخط کی بھی توقع کی جا رہی ہے۔

خیال رہے کہ دو روز قبل وزیراعظم نے دفاعی معاہدے کے بعد اقتصادی تعلقات کو مزید بڑھانے اور اس کے ثمرات حاصل کرنے کیلیے ایک اعلیٰ سطح کی کمیٹی تشکیل دی تھی ، جس کا نوٹی فکیشن جاری کردیا گیا ہے۔

نوٹی فکیشن کے مطابق 18 رکنی اعلیٰ سطح کی کمیٹی دونوں ممالک کے درمیان اقتصادی مذاکرات کی قیادت کرے گی۔