وفاقی کابینہ اجلاس میں پاک-سعودی دفاعی معاہدے کی توثیق

وزیراعظم شہباز شریف کی زیر صدارت اسلام آباد میں منعقدہ وفاقی کابینہ کے اجلاس میں پاکستان اور سعودی عرب کے درمیان طے پانے والے اسٹریٹجک دفاعی معاہدے کی توثیق کر دی گئی۔

کابینہ نے اس اہم معاہدے کو دونوں ممالک کے درمیان باہمی اعتماد اور دفاعی تعلقات کی مضبوطی کی جانب ایک اہم قدم قرار دیتے ہوئے قیادت کو خراجِ تحسین پیش کیا۔ اجلاس میں وزیراعظم نے کابینہ کو اپنے حالیہ دورہ سعودی عرب، قطر، اقوام متحدہ جنرل اسمبلی اور ملائیشیا کے بارے میں تفصیل سے آگاہ کیا۔

کابینہ نے وزارت قومی غذائی تحفظ و تحقیق کی سفارش پر محکمہ پلانٹ پروٹیکشن کے 15 ناقابل پرواز ہوائی جہاز مختلف اداروں کو تعلیمی، یادگاری یا نمائش کے لیے عطیہ کرنے کی منظوری بھی دی، جبکہ بقیہ 4 قابلِ پرواز جہاز بدستور ٹڈی دل کے خلاف استعمال ہوں گے۔

اجلاس میں واپڈا کے ڈیموں اور ہائیڈرو پاور منصوبوں کی حفاظت کے لیے ’واپڈا سیکیورٹی فورس ایکٹ 2025‘ کی اصولی منظوری بھی دی گئی۔

اس کے علاوہ کابینہ نے اقتصادی رابطہ کمیٹی (ECC) کے 2 اکتوبر 2025 کے اجلاس اور کابینہ کمیٹی برائے لیجسلیٹو کیسز کے 22 ستمبر 2025 کو کیے گئے فیصلوں کی بھی توثیق کر دی، البتہ متبادل ادویات اور ہیلتھ پراڈکٹس سے متعلق مجوزہ ترامیم پر مزید غور کے لیے خصوصی کمیٹی تشکیل دی جائے گی۔