نیپرا کا کے-الیکٹرک پر 2 کروڑ 50 لاکھ روپے کا جرمانہ

نیشنل الیکٹرک پاور ریگولیٹری اتھارٹی (نیپرا) نے بجلی کی ترسیل میں غفلت پر کے-الیکٹرک پر 2 کروڑ 50 لاکھ روپے کا جرمانہ عائد کر دیا ہے، جو اسے 15 دن کے اندر جمع کروانا ہوگا۔ یہ کارروائی جنوری 2023 میں ہونے والے ملک گیر بریک ڈاؤن کے بعد کی گئی، جس دوران کے-الیکٹرک کی جانب سے بجلی کی بحالی کے لیے بلیک اسٹارٹ فسیلٹیز استعمال کرنے کی کوششیں ناکام رہیں۔

نیپرا کے مطابق بار بار ٹرپنگ اور ناکام بحالی کی کوششوں سے ظاہر ہوتا ہے کہ کے-الیکٹرک نے ان فسیلٹیز کی ضروری موک ٹیسٹنگ نہیں کی، جو بلیک آؤٹ جیسی ہنگامی صورتحال سے نمٹنے کے لیے انتہائی اہم ہوتی ہے۔ نوٹیفکیشن میں کہا گیا کہ لائسنس ہولڈر کا مکمل انحصار نیشنل ٹرانسمیشن اینڈ ڈسپیچ کمپنی (NTDC) کے نیٹ ورک پر اپنی تیاری پر سنجیدہ سوالات کھڑے کرتا ہے۔

اتھارٹی نے مشاہدہ کیا کہ کے-الیکٹرک نیپرا قوانین، جنریشن رولز 2000 اور گرڈ کوڈ کے متعدد سیکشنز پر عمل کرنے میں ناکام رہا، جس کے نتیجے میں یہ جرمانہ عائد کیا گیا۔ نیپرا نے خبردار کیا کہ اگر رقم ادا نہ کی گئی تو اسے نیپرا ایکٹ اور فائن ریگولیشنز 2021 کے تحت واجب الادا محصولات کے طور پر وصول کیا جائے گا۔

دوسری جانب، کے-الیکٹرک نے اس فیصلے پر ردعمل میں جرمانے کو "حیران کن" قرار دیتے ہوئے کہا ہے کہ وہ نیپرا کے فیصلے کا تفصیلی جائزہ لے رہا ہے اور اس کے بعد آئندہ کا لائحہ عمل طے کرے گا۔