لاہور:مذہبی سیاسی جماعت کے احتجاج کے باعث اورنج ٹرین، میٹرو، اوراسپیڈو بس سروس تیسرے روز بھی معطل

لاہور: صوبائی دارالحکومت لاہور میں مذہبی و سیاسی جماعت کے دھرنے کے باعث اورنج لائن ٹرین ،میٹرو اور اسپیڈو بس سروس تیسرے روز بھی معطل ہے جس سے شہریوں کو مشکلات کا سامنا کرنا پڑ رہا ہے۔

اسی طرح وفاقی دارالحکومت اسلام آباد میں بھی مذہبی جماعت کے ممکنہ احتجاج کے باعث راولپنڈی اور اسلام آباد میں دوسرے روز بھی معمولات زندگی بری طرح متاثر ہیں۔

سڑکوں کی بندش کے باعث جڑواں شہروں میں تجارتی سرگرمیاں بھی معطل ہیں جب کہ ایکسپریس وے، فیض آباد اور آئی جی پی روڈ بھی مکمل طور پر بند ہیں۔

راولپنڈی اور اسلام آباد کو ملانے والا فیض آباد انٹر چینج بھی سیل کر دیا گیا ہے۔ کھنہ پل، کری روڈ اور ڈھوک کالا خان کے راستے بھی تاحال سیل ہیں۔

خیال رہے کہ گزشتہ روز لاہور کے تمام سرکاری اور نجی اسکول فوری طور پر بند کردیئے گئے تھے،سی ای او ایجوکیشن لاہور کے مطابق سڑکیں بند ہونے کے باعث سکول بند کر دیے گئے۔

علاوہ ازیں پنجاب یونیورسٹی کے آج ہونے والے ایل ایل بی کے امتحانات بھی ملتوی کر دیے گئے ہیں۔