مذہبی جماعت کے کارکن پولیس اہلکاروں کو یرغمال بنائے بیٹھے ہیں ، ڈی آئی جی لاہور

لاہور – ڈی آئی جی آپریشنز لاہور محمد فیصل کامران نے ایک پریس کانفرنس میں کہا ہے کہ گزشتہ چند دنوں سے ایک مذہبی و سیاسی تنظیم کی جانب سے بلا جواز ہنگامہ آرائی اور پرتشدد احتجاج کا سلسلہ جاری ہے، جو عوامی و ریاستی امن کے لیے خطرہ بن چکا ہے۔

ان کا کہنا تھا کہ جب بھی ملک ترقی کی سمت بڑھتا ہے، بعض عناصر کسی خفیہ ایجنڈے کے تحت ملک میں افراتفری پھیلانے کی کوشش کرتے ہیں۔

ڈی آئی جی کے مطابق قانون نافذ کرنے والے اداروں نے پرامن حل کے لیے متعلقہ جماعت سے متعدد بار رابطہ کیا اور بات چیت کی کوشش کی، مگر احتجاجی عناصر مسلسل تشدد پر اتر آئے۔

فیصل کامران نے بتایا کہ ان واقعات کے دوران پنجاب پولیس کے 112 اہلکار زخمی ہوئے، جن میں سے کئی کو علاج کے بعد گھر بھیج دیا گیا، جبکہ متعدد تاحال ہسپتالوں میں زیر علاج ہیں۔

ان کا مزید کہنا تھا کہ کچھ پولیس اہلکار لاپتا ہیں، اور شبہ ہے کہ وہ مذکورہ جماعت کے کارکنوں کے قبضے میں ہیں۔

ایک سوال کے جواب میں انہوں نے کہا کہ پرتشدد گروہوں نے سرکاری املاک کو نقصان پہنچایا، شہریوں کی گاڑیاں چھینی گئیں، قیمتی سامان لوٹا گیا، اور پولیس اسٹیشنز پر حملے کیے گئے۔ اس کے ساتھ ساتھ اورنج لائن ٹرین سروس میں بھی توڑ پھوڑ کی گئی۔

ڈی آئی جی نے بتایا کہ 100 سے زائد افراد کو گرفتار کیا گیا ہے۔ انہوں نے دعویٰ کیا کہ جن مقاصد کی بنیاد پر احتجاج ہو رہا ہے، وہ دراصل معاہدے سے مطمئن ہو چکے ہیں، لیکن مذکورہ جماعت اب بھی بلا وجہ اشتعال انگیزی پھیلا رہی ہے۔

فیصل کامران کا کہنا تھا کہ اگر کسی نے عام شہریوں کو ہدف بنایا، تو ریاستی ادارے مکمل تیاری کے ساتھ اس کا جواب دیں گے۔

پریس کانفرنس کے اختتام پر انہوں نے کہا کہ سیف سٹی کیمروں کی مدد سے شواہد اکٹھے کیے جا رہے ہیں، اور جو بھی قانون کی خلاف ورزی میں ملوث پایا گیا، اسے انصاف کے کٹہرے میں لایا جائے گا۔ ریاست کسی بھی قسم کے پرتشدد عمل کو برداشت نہیں کرے گی۔