آزاد کشمیر کے دو وزرا مستعفی، وزیراعظم آزاد کشمیر پر سنگین الزامات

آزاد کشمیر کے وزیر خزانہ عبدالمجید خان اور وزیر خوراک چوہدری اکبر ابراہیم نے اپنی وزارتوں سے استعفیٰ دے دیا ہے۔ دونوں رہنماؤں نے ایک مشترکہ پریس کانفرنس کے دوران استعفے کا اعلان کیا، جس میں انہوں نے حکومت پر شدید تنقید بھی کی۔

عبدالمجید خان نے الزام لگایا کہ ریاستی حکومت نے ایک منظم سازش کے تحت مہاجرین کی بارہ نشستیں ختم کرنے کا فیصلہ کیا، جس کے ذمہ دار براہ راست وزیراعظم آزاد کشمیر چوہدری انوار الحق ہیں۔ ان کا کہنا تھا کہ وہ موجودہ حکومت کے ساتھ مزید کام نہیں کر سکتے کیونکہ یہ ریاست کے مفاد کے خلاف ہے۔

چوہدری اکبر ابراہیم نے بھی وزیراعظم پر تنقید کرتے ہوئے کہا کہ انوار الحق نے عوام کیلئے وزیراعظم ہاؤس کے دروازے بند کر دیے ہیں۔ ان کے مطابق اہم فائلز کو کئی کئی ماہ تک التواء میں رکھا گیا، اور عوامی مسائل پر توجہ نہیں دی گئی۔ اکبر ابراہیم نے سوال اٹھایا کہ اگر عوامی نمائندوں پر مشتمل ایکشن کمیٹی بن چکی ہے تو آج تک وزیراعظم سے استعفیٰ کا مطالبہ کیوں نہیں کیا گیا؟ انہوں نے اس موقع پر وزیراعظم کے فوری استعفے کا بھی مطالبہ کیا۔