میٹا نے انسٹا گرام میں اے آئی پر مبنی نئے فیچرز کا اضافہ کر دیا

میٹا نے انسٹا گرام اسٹوریز کو مزید بہتر بنا دیا ہے۔

کمپنی کی جانب سے جاری ایک بیان میں بتایا گیا کہ اب صارفین انسٹا گرام اسٹوریز کو مختلف طریقوں سے ایڈٹ کرسکیں گے، اس مقصد کے لیے انہیں جنریٹیو آرٹی فیشل انٹیلی جنس (اے آئی) پر مبنی نئے فیچرز دستیاب ہوں گے۔

ویسے تو اسٹوریز میں تصاویر اور ویڈیوز کے اضافے، ہٹانے یا تبدیل کرنے کا فیچر جون 2025 سے دستیاب ہے، مگر اب اسے مزید بہتر بنایا گیا ہے۔ کمپنی کے مطابق صارفین اب انسٹا گرام اسٹوری میں موجود فوٹو کو ری اسٹائل کرسکیں گے جبکہ پوسٹ میں اسٹیکرز بھی ایڈ کرسکیں گے تاکہ آپ کے دوست ان کو اپنی اسٹوریز کے لیے استعمال کرسکیں۔

اس مقصد کے لیے ایپ کے نیچے دائیں جانب ایک نیا براؤزر آئیکون شامل کیا گیا ہے جس پر کلک کرکے آپ مختلف اسٹائلز کو دیکھ سکتے ہیں۔ کمپنی نے مزید بتایا کہ صارفین اپنی اسٹوریز میں موسموں یا تہواروں کے مطابق نئے ایفیکٹس کو بھی ایڈ کرسکیں جبکہ مختصر ویڈیوز کو بھی ری اسٹائل کرنا ممکن ہوگا۔

انسٹا گرام کی جانب سے اسٹوریز میں ٹیکسٹ کو بھی ری اسٹائل کرنے کی سہولت فراہم کی جا رہی ہے۔ اس نئے فیچر میں اے آئی کی جانب سے تیار کردہ ٹیکسٹ استعمال کرکے اسٹوری کو زیادہ بہتر بنایا جائے گا۔ آپ میٹا اے آئی کو خود بھی اس مقصد کے لیے استعمال کرسکتے ہیں۔