اونچی آواز میں نورجہاں کا گانا’’ ویکھ وے دن چڑھیا کہ نہیں‘‘ سننے پر شہری گرفتار

قصور: پنجاب کے ضلع قصور کے نواحی علاقے پھولنگر میں شہری کو اونچی آواز میں ملکہ ترنم نور جہاں کا گانا سننا مہنگا پڑ گیا۔

تفصیلات کے مطابق نواحی شہر پھول نگر میں پولیس نے دکان میں اونچی آواز میں ملکہ ترنم نورجہاں کا گانا سننے پر دکاندار کو گرفتار کرکے پنجاب ساؤنڈ ایکٹ کے تحت مقدمہ درج کرلیا۔
حکام کا کہنا ہے کہ تھانہ صدر پتوکی پولیس کو اطلاع موصول ہوئی کہ پھول نگر کے ایک بازار میں دکاندار اپنی دکان میں بلند آواز میں گلوکارہ نورجہاں کا گانا’’ ویکھ وے دن چڑھیا کہ نہیں ‘‘اونچی آواز میں چلا رہا ہے،جس سے شہریوں اور راہ گیروں کو شدید پریشانی کا سامنا کرنا پڑا۔

حکام کا کہنا ہے کہ اطلاع ملتے ہی پولیس موقع پر پہنچ گئی اور دکاندار کو پنجاب ساؤنڈ ایکٹ کے تحت گرفتار کرلیا۔

خیال رہے کہ کچھ روز قبل اوکاڑہ میں بھی پولیس نے معروف پنجابی گلوکارہ نصیبو لال کا گانا بجانے پر رکشہ ڈرائیور کے خلاف مقدمہ درج کرتے ہوئے گرفتار کیا تھا۔

پولیس ترجمان کا کہنا تھا کہ قانون کی خلاف ورزی کسی صورت برداشت نہیں کی جائے گی،جبکہ خلاف ورزی کرنے والوں کے خلاف سخت کارروائی کی جائے گی۔