بڑھتی ہوئی اسموگ کے پیش نظر پنجاب میں اسکولوں کے اوقات کار میں تبدیلی کا اعلان

لاہور: پنجاب حکومت نے صوبے بھر میں بڑھتی ہوئی اسموگ کی صورتحال کے پیشِ نظر اسکولوں کے اوقاتِ کار میں تبدیلی کا اعلان کیا ہے۔ 

اس حوالے سے صوبائی محکمہ تعلیم کی جانب سے نئے اوقات کا ر شیڈول جاری کر دیا گیا ہے۔

جاری کر دہ شیڈول کے مطابق پیر سے اسکولوں میں کلاسز صبح 8 بج کر 45 منٹ پر شروع ہوں گی۔

پنجاب کے وزیرِ تعلیم رانا سکندر حیات نے سماجی رابطے کی ویب سائٹ ایکس (سابقہ ٹوئٹر) پر اپنے بیان میں کہا کہ موجودہ اسموگ کی صورتحال کے پیشِ نظر سردیوں کے دوران اسکولوں کے نئے اوقات صبح 8:45 سے دوپہر 1:30 بجے تک ہوں گے۔

خیال رہے کہ لاہور گزشتہ تین دنوں سے دنیا کا سب سے زیادہ آلودہ شہر قرار پایا ہے، جہاں فضائی آلودگی خطرناک حد تک پہنچ چکی ہے۔ شہر کا مجموعی ایئر کوالٹی انڈیکس (AQI) 412 تک جا پہنچا ہے، جس کے باعث صحت سے متعلق ہدایات جاری کی گئی ہیں اور صوبے بھر میں آلودگی کے ذرائع کے خلاف کریک ڈاؤن شروع کر دیا گیا ہے۔

دوسر ی جانب پنجاب ڈیزاسٹر مینجمنٹ اتھارٹی (PDMA) نے صوبے کے مشرقی اضلاع، جن میں لاہور، گوجرانوالہ، شیخوپورہ، قصور، ننکانہ صاحب، فیصل آباد، ملتان، بہاولپور، رحیم یار خان اور خانپور شامل ہیں، کے لیے ہائی الرٹ جاری کیا ہے۔

پی ڈی ایم اے کے ڈائریکٹر جنرل عرفان علی کاٹھیا کے مطابق موسمیاتی ماہرین کی پیشگوئی ہے کہ نومبر سے وسط دسمبر تک اسموگ کی شدت میں مزید اضافہ متوقع ہے۔