امریکی صدر  کی چینی ہم منصب سے جنوبی کوریا کے شہر بوسان میں 6 سال بعد اہم ملاقات

امریکی صدر  ڈونلڈ ٹرمپ اور چینی صدر شی جن پنگ کی جنوبی کوریا کے شہر بوسان میں 6 سال بعد اہم ملاقات ہوئی ہے۔

امریکی صدر نے چینی ہم منصب سے مکالمہ کیا کہ  آپ سے دوبارہ مل کر خوشی ہوئی۔

امریکی صدر نے چین کے ساتھ طویل مدتی بہترین تعلقات کی خواہش کا اظہار کرتے ہوئے کہا کہ امریکا اور چین کے درمیان پہلے ہی بہت سی چیزوں پر اتفاق ہوچکا ہے تاہم مزید کچھ معاملات پر آج اتفاق ہو جائے گا۔  انہوں نے چین کے ساتھ تجارتی معاہدہ ہونے کا امکان ظاہر کردیا۔

President Donald J. Trump meets with Chinese President Xi Jinping in South Korea.

"I think we're going to have a fantastic relationship for a long period of time, and it is an honor to have you with us." pic.twitter.com/ISpVBzkvN3

— The White House (@WhiteHouse) October 30, 2025

چینی صدر شی جن پنگ نے کہا کہ چین اور امریکا کو ایک دوسرے کا دوست ہونا چاہیے، دونوں ممالک کے باہمی مفاد کے مسائل پر کھلے دل سے گفتگو ضروری ہے۔ دونوں ملکوں کی تجارتی ٹیموں میں بنیادی نکات پر اتفاق رائے ہوچکا ہے، دونوں ممالک کی ترقی کے لیے سازگار ماحول قائم کیا جائے۔

چینی صدر نے حالیہ غزہ جنگ بندی میں صدر ٹرمپ کے اہم کردار کو  سراہا اور کہا کہ چین بھی دیگر تنازعات کے حل کے لیے امن مذاکرات کو فروغ دے رہا ہے۔

صدر شی نے ٹرمپ سے کہا کہ چین اور امریکا کے درمیان اختلا فات معمول کی بات ہے، باہمی تعلقات کی مضبوط بنیاد کے لیے آپ کے ساتھ کام جاری رکھنے کو تیار ہیں۔

اس سے قبل بوسان پہنچنے والے امریکی صدر نے چینی ہم منصب سے مصافحہ کیا، دونوں رہنماؤں نے تصاویر  کھنچوائیں۔

Trump shakes hands with 'VERY TOUGH' Xi to start HISTORIC TALKS pic.twitter.com/EExfQM7t0h

— RT (@RT_com) October 30, 2025

ملاقات سے قبل امریکی صدر نے صحافیوں کے سوالات کے جوابات دیتے ہوئے کہا کہ انہیں کوئی شک نہیں کہ یہ ملاقات کامیاب ہوگی تاہم اس دوران صدر ٹرمپ نے یہ بھی کہا کہ چینی صدر سخت گیر مذاکرات کار  ہیں جو کہ اچھی بات نہیں۔ 

صدر ٹرمپ نے مزید کہا کہ ہم ایک دوسرے کو اچھی طرح جانتے ہیں اور  دونوں ممالک کے درمیان اچھے تعلقات ہیں اور  آج کی ملاقات مفید رہے گی۔