ویمنز ورلڈ کپ: جنوبی افریقہ نے انگلینڈ کو125 رنز سے شکست دے کرپہلی مرتبہ فائنل تک رسائی حاصل کر لی

گوہاٹی:  آئی سی سی ویمنز ورلڈ کپ کے پہلے سیمی فائنل میں جنوبی افریقا نے انگلینڈ کو 125 رنز سے شکست دیکر پہلی مرتبہ فائنل کیلئے کوالیفائی کرلیا۔

تفصیلات کے مطابق بھارت کے شہر گوہاٹی میں کھیلے جانے والے میچ میں جنوبی افریقا نے پہلے بلے بازی کرتے ہوئے 320 رنز کا ہدف دیا جس کے تعاقب میں انگلش ٹیم 42.3 اوورز میں 194 رنز بناکر ڈھیر ہوگئی۔

انگلینڈ کی جانب سے اننگز کا آغاز انتہائی مایوس کن رہا، اوپنر جوڑی سمیت 3 کھلاڑی بغیر کھاتا کھولے پویلین لوٹ گئے، کپتان نیٹ سکیور برنٹ نے 64 ، ایلس کیپسی نے 50، ڈینی وائٹ ہوج نے 34 اور لنسی اسمتھ نے 27 رنز کی اننگز کھیلی۔

پہلے بیٹنگ کرتے ہوئے جنوبی افریقا نے مقررہ 50 اوورز میں 319 رنز بنائے، جنوبی افریقہ کی کپتان نے 169 رنز کی شاندار اننگز کھیلی، تزمین برٹس نے 45، ماریزان کپ نے 42 اور چلو ٹریون 33 رنز بنائے۔

جنوبی افریقا ویمنز ٹیم کا 2 نومبر کو ہونیوالے فائنل میں مقابلہ کل ہونیوالے بھارت اور آسٹریلیا کے درمیان دوسرے سیمی فائنل کی فاتح ٹیم سے ہوگا۔