افغانستان، بھارت کی جنگ لڑ رہا ہے،اگر باز نہ آیا تو اس کا انجام زیادہ برا ہوگا،رانا تنویر حسین

مریدکے: وفاقی وزیر برائے قومی غذائی تحفظ و تحقیق رانا تنویر حسین نے افغانستان پر تنقید کرتے ہوئے کہا کہ وہ بھارت کی جنگ لڑ رہا ہے، اگر باز نہ آیا تو اس کا انجام بھارت سے بھی زیادہ برا ہوگا۔

تفصیلات کے مطابق مریدکے نواحی علاقے الہ پور سیداں میں میڈیا سے گفتگوکرتے ہوئے کہا کہ امریکہ اور بھارت کے درمیان دفاعی معاہدہ پاکستان کے لیے کسی پریشانی کا باعث نہیں، پاکستان کی عسکری قوت اور اس کے سپہ سالار کی صلاحیتیں ایسی ہیں کہ کوئی بھی ملک میلی آنکھ سے نہیں دیکھ سکتا۔

انہوں نے افغانستان پر تنقید کرتے ہوئے کہا کہ وہ بھارت کی جنگ لڑ رہا ہے، اگر باز نہ آیا تو اس کا انجام بھارت سے بھی زیادہ برا ہوگا۔

میڈیا سے گفتگو میں انہوں نے کہا کہ بین الاقوامی میڈیا کا پاکستان کو سفارتی فاتح قرار دینا ایک بڑا اعزاز ہے جو ملک کی خارجہ پالیسی کی کامیابی کا ثبوت ہے،ان کا کہناتھا کہ سائفر اور فارم 47 صرف پی ٹی آئی کا بیانیہ تھا جسے حالیہ انتخابات نے دفن کر دیا۔

پاکستان تحریک انصاف پر تنقید کرتے ہوئے رانا تنویر حسین نے کہاکہ پی ٹی آئی نے ہمیشہ متنازعہ شخصیات کو سرکاری عہدوں پر تعینات کیا اور اب وہی افراد اپنے انجام کو پہنچ رہے ہیں،ان کا کہنا تھا کہ اگر بانی پی ٹی آئی نے عدم اعتماد کو تحمل اور وقار کے ساتھ قبول کیا ہوتا تو کچھ عزت بچ جاتی۔

اس سے قبل اپنے اعزاز میں نواحی علاقے الہ پور سیداں میں دیے گئے ظہرانے کے دوران میڈیا سے گفتگو کرتے ہوئے رانا تنویر حسین نے کہا کہ کاظمی برادران ہمارے بااعتماد ساتھی ہیں جنہوں نے سماجی خدمت کو اپنا مشن بنا رکھا ہے۔