حکومت 27ویں آئینی ترمیم خود لا رہی ہے، اتحادی جماعتوں سے مشاورت جاری ہے،اسحاق ڈار

اسلام آباد:وزیر خارجہ و نائب وزیراعظم اسحاق ڈار نے کہا ہے کہ حکومت 27 ویں آئینی ترمیم خود لا رہی ہے، کوئی پیراشوٹ ترمیم“ نہیں، ترمیم پر اتحادی جماعتوں سے مشاورت جاری ہے اور جو فائنل ڈرافٹ ہوگا، وہ سامنے لایا جائے گا۔

تفصیلات کے مطابق سینیٹ کے اجلاس میں اظہارِ خیال کرتے ہوئےاسحاق ڈار نے کہا ہے کہ حکومت 27ویں آئینی ترمیم لانے جا رہی ہے، جو آئین اور قانون کے مطابق پیش کی جائے گی،انہوں نے واضح کیا کہ حکومت کو کسی قسم کا خدشہ نہیں، بحث بھی ہوگی اور تمام اتحادیوں کو اعتماد میں لیا جائے گا۔

اجلاس سے خطاب کرتے ہوئےاسحاق ڈار نے کہا کہ پیپلز پارٹی کے ساتھ ایک نکتے پر اتفاق ہو چکا ہے، اب باقی اتحادیوں سے بھی مشاورت مکمل کی جا رہی ہے۔

انہوں نے کہا کہ میری تجویز ہے کہ آئینی ترمیم سب سے پہلے سینیٹ میں پیش کی جائے اور وزیرقانون کو بھی یہ تجویز دی گئی ہے،اسحاق ڈار کا کہنا تھا کہ آئینی ترمیم ہمیشہ حکومت وقت کی ذمہ داری ہوتی ہے، اور یہ ترمیم حکومت ہی پارلیمنٹ میں پیش کرے گی۔

سینیٹ میں اظہارِخیال کرتے ہوئے انہوںنے مزید کہا کہ چیئرمین سینیٹ رولزکے مطابق اپوزیشن لیڈرکے انتخاب کا عمل مکمل کریں اوراراکینِ اپوزیشن کی اکثریت سے اطمینان حاصل کریں،ان کا کہنا تھا کہ حکومت سمجھتی ہے کہ ایوان میں اپوزیشن لیڈر کا ہونا پارلیمانی توازن کے لیے ضروری ہے اور حکومت اس عمل کی مکمل حمایت کرتی ہے۔

انہوں نے سینیٹرعلی ظفر سے درخواست کی کہ وہ اس معاملے پرجلد فیصلہ کریں تاکہ ایوان کا کام مؤثر انداز میں آگے بڑھ سکے۔