علیمہ خان 11 مرتبہ ناقابل ضمانت وارنٹ گرفتاری جاری ہونے کے بعد عدالت میں پیش

اسلام آباد: پاکستان تحریک انصاف ( پی ٹی آئی) کے بانی چئیرمین عمران خان کی ہمشیرہ علیمہ خان 11 مرتبہ ناقابل ضمانت وارنٹ گرفتاری جاری ہونے کے بعد عدالت کے روبرو پیش ہو گئیں۔

تفصیلات کے مطابق راولپنڈی کی انسداد دہشتگردی عدالت (اے ٹی سی )کے جج امجد علی شاہ نے علیمہ خان اور دیگر ملزمان کے خلاف  26 نومبر کے احتجاج پر درج مقدمے کی سماعت کی۔

دوران سماعت عمران خان کی بہن علیمہ خان  11 ناقابل ضمانت وارنٹ گرفتاری جاری ہونے بعد عدالت پیش ہوئیں۔ 

اس سے قبل گزشتہ سماعت پر عدالت نے مسلسل غیرحاضری پر علیمہ خان کے 37 بینک اکاؤنٹ منجمد کرتے ہوئے ان کے ضمانتی مچلکے بھی خارج کردیے تھے،نادرا حکام نے عدالت میں پیش ہوکر بتایا تھا کہ علیمہ خان کا پاسپورٹ اور شناختی کارڈ بلاک کردیا گیا ہے۔

اس کے علاوہ پنجاب ریونیو بورڈ نے ان کی جائیداد کی تفصیلات بھی عدالت میں پیش کی تھیں۔

علیمہ خان کی پیشی کے موقع پر ہنگامہ خیز سماعت ایک گھنٹے سے زائد جاری رہی اور اس دوران سرکاری وکیل نے وارنٹ منسوخی اور بینک اکاؤنٹس بحالی کی سخت مخالفت کی، تاہم عدالت نے آئندہ تاریخ پر علیمہ خان کو حاضری لازمی کا حکم دیتے ہوئے جاری تمام وارنٹس ختم کر دیے اور آئندہ سماعت پر پانچوں گواہان کو بھی طلب کر لیا۔

خیال رہے کہ علیمہ خان کے خلاف26 نومبر کے احتجاج پر تھانہ صادق آباد میں مقدمہ درج ہے جس میں ان پر کارکنان کو  پرتشدد احتجاج پر اکسانے، جلاؤ گھیراؤ اور کارسرکار میں مداخلت کا الزام ہے۔