یوکرین کے صدر نے آرمی چیف کو عہدے سے ہٹا دیا

غیر ملکی خبر رساں ادارے کے مطابق  صدر وولڈیمر زیلنسکی نے یوکرائن کی مسلح افواج کے سربراہ کو عہدے سے ہٹا دیا ہے۔

صدارتی ترجمان سیرحی نکیفوروف  کا کہنا ہے کہ  27 جولائی کو  جنرل رسلان خومچک کی جگہ جنرل ویلری زالوزنی کو تقریبا 250،000 فعال یوکرائنی فوجیوں کا کمانڈر مقرر کیا جائے گا۔ انہوں نے کہا کہ  یہ برطرفی یوکرین کی مسلح افواج اور وزارت دفاع کے مابین لڑائی جھگڑے کو روکنے کی کوشش ہے۔

نکیفوروف نے کہا  صدر وولڈیمر زیلنسکی کو رسلان خومچک کی حب الوطنی ، اپنے حلف سے وفاداری ، اور پیشہ ورانہ مہارت کے بارے میں کوئی شبہ نہیں ہے۔لیکن صدر وزارت دفاع اور یوکرائن کی مسلح افواج کے مابین ہم آہنگی دیکھنا چاہتے ہیں۔ بدقسمتی سے ، ہمیں اس طرح کی ہم آہنگی نظر نہیں آتی۔

ترجمان صدر زیلنسکی کا کہنا ہے کہ آرمی چیف رسلان  کو نیشنل سکیورٹی اور ڈیفنس کونسل میں  کوئی عہدہ دیا جائے گا۔

یوکرین کی مسلح افواج اور روس کے حمایت یافتہ علیحدگی پسندوں کے مابین لڑائی میں اپریل 2014 سے لوہانسک اور ڈونیٹسک علاقوں میں 13،200 سے زیادہ افراد ہلاک ہوچکے ہیں۔