روسی فوجی ٹرانسپورٹ طیارہ آزمائشی پرواز کے دوران آئیوانوو ریجن میں گر کر تباہ،7 افراد جاں بحق

ماسکو: روسی فوج کا ٹرانسپورٹ طیارہ ٹیسٹ فلائٹ کےدوران آئیوانوو ریجن  میں گر کر تباہ ہو گیا جس کے نتیجے میں 7 افراد جاںبحق ہوگئے۔

تفصیلات کے مطابق روسی سرکاری خبر رساں ادارےنے بتایا کہ حادثے کے وقت طیارے میں 7 افراد سوار تھے جن کی ہلاکت کی تصدیق ہو گئی ہے۔

اس حوالے سےروسی وزارتِ دفاع نے بیان میں کہا کہ ’آئیوانوو ریجن میں مرمت کے بعد کی گئی ٹیسٹ فلائٹ کے دوران اے این-22 ملٹری ٹرانسپورٹ طیارہ گر کر تباہ ہوگیا‘۔ بیان کے مطابق طیارہ غیر آباد علاقے میں گرا۔

وزارتِ دفاع نے مزید بتایا کہ سرچ اینڈ ریسکیو ٹیمیں موقع پر بھیج دی گئی ہیں جبکہ حادثے کی تحقیقات بھی شروع کر دی گئی ہیں۔

خبررساں ایجنسی کے مطابق روس کے یوکرین کے خلاف جاری حملے یا کیف کے کسی ممکنہ کردار کے حوالے سے اس حادثے کا کوئی تعلق ظاہر نہیں کیا گیا۔

خیال رہے کہ آئیوانوو کا علاقہ ماسکو کے مشرق میں تقریباً 200 کلومیٹر کے فاصلے پر واقع ہے۔