بنگلا دیش نے ٹی ٹونٹی ورلڈ کپ کیلئے اسکواڈ کا اعلان کر دیا،ٹیم بھارت نہ بھیجنے کا فیصلہ

ڈھاکا:بنگلہ دیش کرکٹ بورڈ ( بی سی بی) نے ورلڈ کپ 2026 کیلئے 15 رکنی اسکواڈ کا اعلان کر دیا ہے، جس میں فاسٹ بولرز مستفیض الرحمان اور تسکین احمد بولنگ اٹیک کی قیادت کریں گے۔

فاسٹ بولنگ ڈیپارٹمنٹ میں مستفیض اور تسکین کے ساتھ تنزیم حسن، شوریف الاسلام اور محمد سیف الدین شامل ہیں، جبکہ اسپن بولنگ کی ذمہ داری رشاد حسین، نسیم احمد اور مہدی حسن سنبھالیں گے۔

اسی طرح بیٹنگ میں لٹن داس ٹیم کی قیادت کریں گے اور ان کے ساتھ تنزید حسن اور سیف حسن رنز بنانے کی ذمہ داری نبھائیں گے۔
بنگلہ دیش اسکواڈ:

لٹن داس (کپتان)، تنزید حسن، پرویز حسین ایمون، سیف حسن، توحید ہردوئے، شمیم حسین، قاضی نورالحسن سوجن، مہدی حسن، رشاد حسین، نسیم احمد، مستفیض الرحمان، تنزیم حسن ساقب، تسکین احمد، سیف الدین، شوریف الاسلام شامل ہیں۔

خیال رہے کہ بنگلہ دیش گروپ سی میں شامل ہے اور گروپ مرحلے میں ویسٹ انڈیز، انگلینڈ اور اٹلی کے خلاف کولکتہ میں میچز کھیلے گا، بنگلہ دیش اپنے ورلڈ کپ مہم کا آغاز 7 فروری کو ویسٹ انڈیز کے خلاف میچ سے کرے گا۔

دوسری جانب انڈین پرئمیر لیگ (آئی پی ایل )سے فاسٹ بولر کو ریلیز کرنے کے معاملے پر سخت ایکشن لیتے ہوئے بنگلا دیش کرکٹ بورڈ نے اپنی ٹیم ٹی ٹونٹی ورلڈکپ کے لیے بھارت نہ بھیجنے کا فیصلہ کر لیا۔ 

بی سی بی ذرائع کے مطابق بنگلادیش کرکٹ بورڈ حکومت کو اپنے فیصلے سے آگاہ کرے گا، بی سی بی حکومتی مشاورت کے بعد باضابطہ اعلان کرے گا اور حکومتی فیصلے کے ساتھ ہی بنگلادیش کرکٹ بورڈ آئی سی سی کو بھی معاملے سے آگاہ کرے گا۔

ذرائع کے مطابق بی سی بی ورلڈکپ میں اپنے میچز سری لنکا میں کرانے کا کہے گا ، اس سے قبل بنگلا دیش کے میچز انڈیا میں شیڈولڈ ہیں، بنگلادیش نے تین میچز کولکتہ اورایک میچ ممبئی میں کھیلنا ہے۔