نیویارک :کورونا ویکسین لگوانے پر 100 ڈالر انعام کا اعلان

غیر  ملکی خبر رساں ادارے کے مطابق نیویارک کے میئر نے حکومتی ویکسین سینٹرز سے ویکسین لگوانے والوں کو100ڈالر رقم دینے کا اعلان کرتے ہوئے کہا کہ منصوبے سے کورونا کا پھیلاؤ روکنے میں مدد ملے گی۔ یہ اعلان اس وقت سامنے آیا ہے جب امریکہ میں  کورونا  ڈیلٹا ویرینٹ کیسز تیزی سے رپورٹ ہوئے  ہیں ، گذشتہ جمعہ کو  روزانہ نئے کیسز کی اوسط ایک ہفتہ سے 32 فیصد زیادہ تھی۔جس کے بعد سے  شہر میں کورونا ویکسی نیشن مہم تیز کی گئی ہے ۔

  میئر نیویارک  کاایک نیوز بریفنگ کے دوران کہنا تھا کہ کورونا کیخلاف ویکسی نیشن سب سے اہم ہے، اگر ہم ویکسی نیشن پر بات نہیں کررہے تو اس کا مطلب ہے کہ ہم اس کے حل کی بات نہیں کررہے۔ ویکسین  آپ کے اور آپکی فیملی کے زندہ رہنے کے لیے ضروری ہے۔

نیویارک کے محکمہ صحت کے اعداد و شمار کے مطابق  نیویارک شہر کے 45 سے  65 فی صدافراد کو  مکمل طور پر ویکسین لگائی جاچکی ہے ۔کورونا کی ایک ڈوز لگوانے والے شہریوں کی تعداد  59فی صد تک پہنچ چکی ہے ۔

واضح رہے کہ امریکہ میں کورونامتاثرین کی تعداد 35,487,490 تک جاپہنچی ہے جبکہ دنیا بھر میں کورونا سے ہلاکتوں کی تعداد 4,203,749 ہوگئی ہے ۔