وزیراعظم کی چھوٹے اور درمیانے کاروبار کیلئے آسان شرائط پر قرضوں کی فراہمی تیز کرنے کی ہدایت

اسلام آباد: وزیراعظم محمد شہباز شریف نے متعلقہ اداروں کو ہدایت کی ہے کہ بینکوں اور دیگر مالی اداروں کے ذریعے چھوٹے اور درمیانے درجے کے کاروبار کو آسان شرائط پر قرضے فراہم کرنے کے اقدامات تیز کیے جائیں۔

تفصیلات کے مطابقوزیراعظم کی زیر صدارت ملک میں چھوٹے اور درمیانے درجے کے کاروبار کے فروغ کے لیے سمیڈا (SMEDA) کے بزنس پلان کے حوالے سے اجلاس منعقد ہوا۔

اجلاس میں وفاقی وزیر اطلاعات و نشریات عطا اللہ تارڑ، معاون خصوصی ہارون اختر، گورنر سٹیٹ بینک جمیل احمد، چاروں صوبوں اور آزاد جموں و کشمیر اور گلگت بلتستان کے چیف سیکریٹریز، سمیڈا کے نو منتخب بورڈ ارکان اور متعلقہ اداروں کے افسران شریک تھے۔

 اجلاس میں چھوٹے اور درمیانے درجے کے کاروبار کے فروغ کے لیے آئندہ تین سال کا روڈ میپ پیش کیا گیا، وزیراعظم نے پلان کی تشکیل میں معاون خصوصی ہارون اختر اور سمیڈا کے نو منتخب بورڈ آف ڈائریکٹرز کی پزیرائی بھی کی۔

دوران اجلاس گفتگوکرتے ہوئےوزیراعظم نے کہا کہ چھوٹے اور درمیانے درجے کے کاروبار ملکی معیشت کے لیے ریڑھ کی ہڈی کی حیثیت رکھتے ہیں اور ان کی ترقی سے ملکی برآمدات میں اضافہ کرنے کی بھرپور استعداد موجود ہے۔ 

اجلاس میں چھوٹے اور درمیانے کاروبار کو درپیش مسائل اور ان کے سدباب کے لیے لائحہ عمل، SMES کو ملکی برآمدات میں شامل کرنے کی حکمت عملی اور بزنس پلان میں شامل دیگر اقدامات پر تفصیلی بریفنگ دی گئی۔

اجلاس میں پاکستان کے SMES سیکٹر کو عالمی مارکیٹ میں مسابقتی بنیادوں پر متعارف کرانے کے لیے مختلف ممالک کے ساتھ جاری تعاون اور اقدامات پر بھی بریفنگ دی گئی۔

بریفنگ میں بتایا گیا کہ ملکی SMES کی استعداد بڑھانے کے لیے حال ہی میں چھ شہروں میں متعدد ورکشاپس کا انعقاد کیا گیا اور چھوٹے اور درمیانے کاروبار کو عالمی سطح پر مسابقت کے لیے تیار کرنے کے لیے متعدد تربیتی پروگرامز پر بھی کام جاری ہے۔اجلاس میں خواتین کو SME سیکٹر میں بھرپور کردار ادا کرنے کے حوالے سے اقدامات پر بھی بریفنگ دی گئی۔