حکومت تیز رفتار اور قابلِ اعتماد انٹرنیٹ کیلئے آئندہ ماہ 600 میگاہرٹزسپیکٹرم کی نیلامی کرے گی،شزافاطمہ

اسلام آباد: وفاقی وزیر برائے انفارمیشن ٹیکنالوجی شزا فاطمہ نے کہا ہے کہ حکومت ملک بھر میں تیز رفتار اور قابلِ اعتماد انٹرنیٹ سروسز کو یقینی بنانے کے لیے آئندہ ماہ چھ سو میگا ہرٹز اسپیکٹرم کی نیلامی کرے گی۔

آج اسلام آباد میں ایک تقریب سے خطاب کرتے ہوئے انہوں نے کہا کہ کابینہ نے اسپیکٹرم نیلامی کی توثیق کر دی ہے۔ ان کا کہنا تھا کہ اس اقدام سے نہ صرف فور جی (4G) انٹرنیٹ کی رفتار میں بہتری آئے گی بلکہ فائیو جی (5G) سروسز کے آغاز میں بھی مدد ملے گی۔

وفاقی وزیر آئی ٹی نے نوجوانوں کی استعداد کار میں سرمایہ کاری کے لیے حکومت کے عزم کا اعادہ کیا۔

انہوں نے کہا کہ نوجوان ملک کا سب سے قیمتی اثاثہ ہیں، اور بتایا کہ گزشتہ ڈیڑھ سال کے دوران مختلف شعبوں میں پانچ لاکھ سے زائد نوجوانوں کو تربیت دی جا چکی ہے۔ انہوں نے پاکستان کی ڈیجیٹل تبدیلی پر حکومت کی توجہ کو اجاگر کرتے ہوئے کہا کہ مکمل طور پر ڈیجیٹل گورننس کی جانب پیش رفت جاری ہے۔

آئی ٹی برآمدات پر اطمینان کا اظہار کرتے ہوئے انہوں نے کہا کہ اس سال آئی ٹی برآمدات اوسطاً بیس فیصد اضافے کے ساتھ 3.8 ارب ڈالر سے تجاوز کر گئی ہیں۔