ایس او پیز کی خلاف ورزی: 7 اداکاراؤں اور ایک اداکار پر پنجاب بھر میں کام کرنے پر پابندی عائد

لاہور: پنجاب آرٹس کونسل کی سفارشات  پر سکریٹری محکمہ اطلاعات وثقافت نے  نے ڈرامیٹک پرفارمنس ایکٹ 1876 اور محکمہ اطلاعات وثقافت کے جاری کردہ ایس او پیز کی خلاف ورزی پر 7 اداکاروں اور ایک ادا کار کو صوبہ بھر میں کام کرنے سے روک دیا ۔

تفصیلات کے مطابق یہ کارروائی تھیٹرز میں غیر اخلاقی رقص، نازیبا حرکات، غیر مہذب مکالموںاور دیگر خلاف ورزیوں کی بنیاد پر عمل میں لائی گئی۔ حکومت پنجاب کی ہدایات کے مطابق تھیٹر کو خاندانی اور مثبت تفریح کا ذریعہ بنانے کے لیے زیرو ٹالرنس پالیسی پر عمل جاری ہے،بین ہونے فنکاروں میں سلک جٹ، خوبصورت کیف، ریشم جان،حرا خان، آئمہ خان ، شازیہ بلوچ، عروج حان اور گوشی ٹو شامل ہیں۔

ایگزیکٹو   ڈائریکٹر پنجاب آرٹس کونسل محمد محبوب عالم چوہدری  کا کہنا  ہے کہ پنجاب آرٹس کونسل حکومت پنجاب معیاری اور فیملی تھیٹر کے فروغ کے لیے سنجیدہ اقدامات کر رہی ہے اور کسی بھی فنکار یا تھیٹر انتظامیہ کو غیر اخلاقی سرگرمیوں یا حکومتی ایس او پیز کی خلاف ورزی کی اجازت نہیں دی جائے گی۔

انہوں نے مزید کہا کہ پنجاب آرٹس کونسل ثقافتی اقدار کے تحفظ اور صحت مند تفریح کے فروغ کے لیے بھرپور کردار ادا کر رہی ہے، جبکہ مستقبل میں بھی خلاف ورزی کے مرتکب افراد کے خلاف بلاامتیاز کارروائی عمل میں لائی جائے گی۔