آزاد کشمیر قانون سازاسمبلی : تحریک انصاف کے انوارالحق اسپیکر منتخب

تفصیلات کے مطابق آزادکشمیر قانون اسمبلی کے نومنتخب ارکان نے حلف  اٹھا لیا ،  اجلاس  میں  اسپیکر کیلئے  کل 49اراکین نے ووٹنگ کے عمل میں حصہ لیا،  جس میں تحریک انصاف کے انوار الحق 32ووٹ لے کر منتخب ہوگئے جبکہ  2 ووٹ مسترد ہوئے ۔ سبکدوش ہونے والے سپیکر شاہ غلام قادر نے نئے سپیکر سے حلف لیا ۔  پیپلز پارٹی اور ن لیگ کے مشترکہ  امیدوار فیصل ممتاز راٹھور نے 15ووٹ حاصل کیے۔

آزادکشمیر قانون ساز اسمبلی میں تحریک انصاف کے امیدوار چوہدری ریاض ڈپٹی سپیکر منتخب ہوگئے ہیں ،  ڈپٹی سپیکر کیلئے تحریک انصاف کے امیدوار چوہدری ریاض نے 32 ووٹ حاصل کئے ہیں  جبکہ  متحدہ اپوزیشن کی امیدوار نثاراں عباسی کو 15 ووٹ مل سکے۔

مسلم کانفرنس کے قائد سردار عتیق احمد خان ، پیپلز پارٹی کے جاوید اقبال بڈھانوی اور چوہدری یاسین ایوان میں حاضر نہیں ہوئے جس کی وجہ سے وہ حلف اٹھا نہیں سکے ۔

واضح رہے آزاد کشمیر قانون ساز اسمبلی کے 53 رکنی ایوان میں  تحریک انصاف  کی نشستوں کی مجموعی تعداد 32 ہے۔ آزاد جموں و کشمیر اسمبلی میں پاکستان تحریک انصاف کے امیدوار تینوں مخصوص نشستوں پر کامیاب ہوئے۔ ٹیکنوکریٹ، علما مشائخ اور سمندر پار کشمیریوں کی مخصوص نشستوں کیلئے ہونے والے انتخاب میں تحریک انصاف کے امیدواروں نے کامیابی حاصل کی۔علما و مشائخ کی نشست پر پی ٹی آئی کے پیر محمد مظہر سعید، ٹیکنوکریٹ کی نشست پر رفیق نیئر اور سمندر پار کشمیریوں کی نشست پر محمد اقبال کامیاب ہوئے۔