گلوکار طارق طافو منوں مٹی تلے جا سوئے

لاہور (عبدالسلام علی): معروف گلوکار طارق طافو کو سیکڑوں سوگواروں کی موجودگی میں سپرد خاک کر دیا گیا، مرحوم کی نماز جنازہ کریم بلاک شہنشاہ قبرستان اقبال ٹاون لاہور میں ادا کی گئی، طارق طافو کو طبیعت خرابی کے باعث اسپتال منتقل کیا گیا جہاں وہ جانبر نہ ہو سکے، ان کا جنازہ رہائش گاہ شاہ نور اسٹوڈیو سے اٹھایا گیا۔

طارق طافو کی نماز جنازہ میں اداکار فردوس جمال، گلوکار ملکو، ساحر علی بگا، گلوکار تنویر آفریدی، عارف بٹ ، اجمل دیوان، گلوکار فضل جٹ ، وارث بیگ ، عامر غلام علی ، نعیم وزیر ، ذیشان علی ، ادریس خان ، فلم ڈائریکٹر شہزاد رفیق، گلوکار ولی حامد علی اور دیگر شخصیات شریک ہوئیں، شوبز شخصیات نے طارق طافو کی خدمات کو زبردست خراج تحسین پیش کیا۔

ان کا کہنا تھا کہ طارق طافو کا تعلق موسییقی کے ایک عظیم گھرانے سے ہے ان کے گھرانے پوری زندگی موسیقی کیلئے وقف کی، طارق طافو کی اچانک وفات نے دل بہت رنجیدہ کیا ہے دعا ہے پروردگار انہیں غریق رحمت فرمائے۔

طارق طافو نے کئی سپر ہٹ گیت گائے جن میں سے لاہور لاہور اے گانے نے دنیا بھر میں شہرت حاصل کی،، طارق طافو عظیم موسیقار استاد طافو کے صاحبزادے تھے۔