اسٹیج اور ٹی وی کے سینئر فنکار آصف اقبال منوں مٹی تلے جا سوئے

عبدالسلام علی سے

لاہور: ٹی وی اور اسٹیج کے نامور آرٹسٹ آصف اقبال کو سیکڑوں سوگواروں کی موجودگی میں لاہور کے علاقے اقبال ٹاؤن میں سپرد خاک کر دیا گیا۔

نمازجنازہ میں شوبز انڈسٹری امڈ آئی ،، اس موقع پرفنکار انہیں یاد کر کے آبدیدہ ہو گئے۔ نماز جنازہ میں سینئر اداکار سہیل احمد، افتخار ٹھاکر، اداکار معمر رانا، گوشی خان، حسن مراد، جواد وسیم، اداکارہ میگھا، جان ریمبو، ناصر چنیوٹی، آغا ماجد ، ہنی البیلا ، پروڈیوسر ارشد  چودھری ، طاہر انجم اور دیگر شریک ہوئے۔

شوبز شخصیات نے اداکار آصف اقبال کی فنی خدمات کو سراہا۔ ان کا کہنا تھا کہ آصف اقبال اپنے کام سے مخلص اور در د دل رکھنے والی شخصیت تھے آصف اقبال نے پوری زندگی فن کیلئے وقف کی، وہ ہمیشہ معیاری اور فیملی ڈرامے کو ترجیح دیتے تھے 

اداکار آصف اقبال نے لاتعداد اسٹیج ڈراموں میں اداکاری کے جوہر دکھائے، انہوں نے چند ٹی وی شوز میں بھی کام کیا،،ان کی وفات ہارٹ اٹیک کے باعث ہوئی۔

وزیراطلاعات و ثقافت پنجاب عظمیٰ بخاری اور وزیراعلیٰ سندھ مراد علی شاہ سمیت دیگر سیاسی شخصیات نے بھی آصف اقبال کے انتقال پر اظہار تعزیت کیا۔