وزارت خارجہ نے داسو دہشتگرد حملہ کی تحقیقات سے متعلق تفصیلات جاری کر دیں

ترجمان دفتر خارجہ کا کہنا ہے کہ  داسو دہشتگرد حملہ 14 جولائی کو ہوا، 10 چینی، 3 پاکستانی شہری ہلاک ہوئے تھے،پاکستان نے دہشتگرد حملے کی جامع تحقیقات کیں، ہر موقع پر نتائج سے چین کو آگاہ کیا،دہشتگرد حملے میں ملوث نیٹورک کو افغانستان میں را اور این ڈی ایس کا تعاون حاصل تھا،کالعدم ٹی ٹی پی سوات نے دشمن انٹیلی جینس ایجنسیوں کی ایماء پر حملہ کیا۔

 ترجمان دفتر خارجہ کے مطابق  دہشتگرد حملے کی تمام تر منصوبہ بندی، مواد کی فراہمی افغانستان میں ہوئی، دھماکے میں استعمال ہونے والی گاڑی افغانستان سے پاکستان لائی گئی،گاڑی میں دیسی ساختہ بارودی مواد نصب کیا گیا تھا،خود کش حملہ آور خالد عرف شیخ کو افغانستان میں تربیت دی گئی،خالد عرف شیخ کو خودکش حملے کے لیے افغانستان سے پاکستان لایا گیا۔

ترجمان دفتر خارجہ نے مزید کہا کہ  دہشتگرد حملے میں ملوث چند عناصر گرفتار کر لیے گئے، بقیہ افغانستان میں ہیں، افغان حکومت کو باہمی قانونی معاونت کی استدعا کی ہے، اس بردلانہ حملہ میں ملوث دیگر کی تلاش کے لیے مزید تحقیقات جاری ہیں،پاکستان حملہ میں ملوث تمام عناصر کی گرفتاری، انصاف کے کٹہرے میں لانے کے لئے پرعزم ہے، دشمن قوتوں کو پاکستان اور چین کے مابین آہنی دوستی کو نقصان نہیں پہنچانے دیں گے۔