ٹیکنالوجی کی مدد سے الیکشن کو شفاف بنایا جا سکتا ہے: وزیراعظم

تفصیلات کے مطابق وزیراعظم عمران خان نے نادرا ہیڈ کوارٹرز کا دورہ کیا، جہاں انھوں نے نئے نادرا رجسٹریشن سینٹر اور نئی موبائل رجسٹریشن وین کا افتتاح کیا۔ وزیراعظم کو نادرا کے نئے اقدامات اور پروجیکٹس پر بریفنگ  دی گئی۔   اس موقع پر خطاب کرتے ہوئے وزیراعظم عمران خان نے کہاکہ  حکومت کا اصل کام شہریوں کی زندگیوں کو آسان بنانا ہے ،ڈیٹا اور ٹیکنالوجی کا استعمال کرکے پاکستان میں ایسا الیکشن کرائیں گے کہ سب نتائج  قبول کریں گے ۔

انہوں نے کہاکہ   معاشرے میں الیکشن کے اندر بھی فراڈ ہوتا ہے ،  الیکٹرانک ووٹنگ سے گھروں میں ٹھپے لگانے کے واقعات کم ہو جائیں گے ،   اس طرح جعلی ووٹ ڈالنے اورٹھپے لگانے کا کلچر بھی  ختم ہو جائے گا ۔

وزیراعظم عمران خان نے  مزید  کہاکہ   پاکستان میں تقریبا 30 لاکھ افغان مہاجرین رجسٹرڈ ہیں ، کچھ لوگ ایسے ہیں جو ابھی بھی رجسٹرڈ نہیں ،رجسٹریشن کی بدولت یہ بینکوں میں پیسے بھی رکھ سکیں گے ۔

خیال رہے کہ وزارت سائنس وٹیکنالوجی نے الیکٹرانک ووٹنگ مشین تیار کرنے کے بعد تمام ٹیسٹ بھی مکمل کر لیے ہیں جبکہ ای وی ایم میں الیکشن کمیشن کی ہدایت کے مطابق فیچرز رکھے گئے ہیں۔عام انتخابات کے لیے 4 لاکھ الیکٹرانک ووٹنگ مشینیں درکار ہوں گی۔ ای وی ایم بیٹری کی مدد سے 2 دن تک فعال رہ سکتی ہے۔الیکٹرانک ووٹنگ مشین (ای وی ایم) منفی 10 تا 55 ڈگری سینٹی گریڈ پر کام کر سکتی ہے۔ ووٹ ڈالنے کے الیکٹرانک ریکارڈ کے ساتھ بیلٹ پیپر بھی ہو گا۔