سینیٹ انتخابات میں پی ٹی آئی کو بھر پور کامیابی ملے گی:وزیراعظم

وفاقی دارلحکومت اسلام آباد میں وزیراعظم عمران خان کی زیرصدارت وفاقی کابینہ کا اجلاس ہوا جس میں سینیٹ انتخابات، تنخواہوں اور الاونسز کے معاملات اور ایجنڈا پر غور کیا گیا اور وزراء نے سینیٹ انتخابات پر اپنی اپنی تجاویز بھی پیش کیں۔جس پر وزیر اعظم عمران خان نے سینیٹ انتخابات کے حوالے سے تیاریوں کی ہدایت دے دیں۔

اجلاس میں وفاقی کابینہ نے وفاقی ملازمین کو ایڈہاک الاؤنس دینے کی منظوری دیدی جس کے بعد گریڈ 1 سے 19 تک کے ملازمین کو ڈسپیریٹی ریڈکشن الاونس ملے گا اور ڈسپیریٹی ریڈکشن الاونس 25 فیصد ہوگا جبکہ گریڈ 20 سے 22 کے افسرون کی تنخواہیں بجٹ میں بڑھیں گی۔وفاقی ملازمین کی تنخواہوں میں اضافے کی سمری پر بعض وزراء نے اعتراض اٹھا دیا اور رائے دی کہ تنخواہوں میں اضافے سے خزانے پر بوجھ پڑے گا۔

وفاقی کابینہ اجلاس میں سینیٹ  الیکشن پر ایک گھنٹہ طویل بحث ہوئی اورایک ایک نشست پروزراء نے اپنی اپنی رائے دی۔سینیٹ امیدواروں حفیظ شیخ اور یوسف رضا گیلانی پر بھی بات چیت کی گئی۔کابینہ ارکان نے  رائے دی کہ بدقسمتی ہے کہ نااہل شخص سینیٹ کا الیکشن لڑ رہا ہے،جس پر وزیراعظم عمران خان کا کہنا تھا کہ تمام پارٹی رہنماء سینیٹ الیکشن پر بھر پور توجہ دیں،سینیٹ انتخابات میں پی ٹی آئی کو بھر پور کامیابی ملے گی۔