وزیراعظم نے بطور چئیرمین پی ٹی آئی الیکشن کمیشن کے شوکاز نوٹس کا جواب دے دیا

تفصیلات کے مطابق  وزیراعظم عمران خان نے پی ٹی آئی انٹرا پارٹی انتخابات کے لیے الیکشن کمیشن سے ایک سال کی مہلت مانگ لی ہے،وزیراعظم عمران خان نے پی ٹی آئی انٹراپارٹی انتخابات کی تاخیر کی وجہ کورونا وبا کو قرار دے دیا۔

وزیراعظم عمران خان نے الیکشن کمیشن سے شوکاز نوٹس واپس لینے کی درخواست کردی ہے۔وزیر اعظم نے جواب میں کہا ہےکہ ملک بھر میں کورونا وبا اور این سی اوسی کی ہدایات کے مدنظر انٹراپارٹی انتخابات نہیں کرائے جاسکے، ملک بھر میں کورونا وبا اور این سی او سی کی ہدایات کو مدنظر رکھتے ہوئے انٹراپارٹی انتخابات کا فیصلہ کیا جائے۔

خیال رہے کہ  الیکشن کمیشن نے پی ٹی آئی کو مقررہ وقت پر انٹراپارٹی انتخابات نہ کرانے پر شوکاز نوٹس جاری کیا تھا۔الیکشن کمیشن نے وزیراعظم عمران خان سے چودہ دن کے اندر جواب طلب  کیا تھا ۔الیکشن کمیشن نے نوٹس میں کہا تھا کہ  انٹرا پارٹی الیکشن نہ کرانے پر کیوں نہ پارٹی کا انتخابی نشان واپس لے لیا جائے۔

پی ٹی آئی نے 13جون 2021 کو انٹرا پارٹی الیکشن کی تفصیلات الیکشن کمیشن کو فراہم کرنی تھی۔الیکشن ایکٹ کے تحت تمام سیاسی جماعتیں مقررہ وقت پر انٹراپارٹی انتخابات کرانے کی پابند ہیں۔