طالبان نے وعدہ کیا ہے کہ ان کی سرزمین پاکستان کیخلاف استعمال نہیں ہو گی:شیخ رشید

تفصیلات کے مطابق اسلام آباد میں میڈیا سے گفتگو کرتے ہوئے وفاقی وزیرِ داخلہ شیخ رشید احمد نے  کہا کہ افغانستان میں امن و استحکام کے خواہاں ہیں ۔ پاکستان دنیا کیساتھ کھڑا ہے اورافغان کی ترقی اور امن پاکستان کا سکون اور ترقی ہے۔ افغانستان کا مسئلہ افغانیوں کا مسئلہ ہے ،افغانستان میں کوئی خون ریزی نہیں ہوئی ۔

انہوں نے کہاکہ پاکستان افغانستان میں انخلاء میں بھرپور کردار ادا کر رہا ہے، ہم اپنا کوئی بھی علاقہ افغانستان کیخلاف استعمال نہیں ہونے دیں گے۔ ہم نے دہشتگردی کیخلاف جنگ میں قربانیاں دیں ، ہم نے امریکی اتحادی ہونے کی بڑی قیمت ادا کی ہے ۔

شیخ رشید نے کہاکہ     چمن بارڈر پاکستان اور افغانستان کے لیے تجارتی راستہ ہے، ہم پر مہاجرین کا بوجھ نہیں، چمن کے راستے کھلے ہیں۔ہم افغانستان سے کابل ایئر پورٹ سے  2538لوگوں کو پاکستان لائے ہیں ، 15سو لوگ تورخم کے ذریعے آئے ہیں اس میں افغانی بھی ہیں ، پاکستان پر افغان شہریوں کا کوئی دباؤ نہیں  اور تورخم اور چمن کے راستے   15تاریخ سے لیکر 24 تاریخ تک بزنس میں اضافہ ہوا ۔

وزیر داخلہ کا مزید کہنا تھا  کہ دشمن قوتیں بلوچستان کے حالات خراب کرنے کے درپے ہیں، بھارت پاکستان کے خلاف سازشوں میں ملوث ہے۔ موجودہ حالات میں بھارت کو منہ کی کھانی پڑی ہے ۔افغانستان میں تمام بھارتی سفارتخانے پاکستان کیخلاف استعمال ہو رہے تھے، بھارت سی پیک کیخلاف سازش میں ملوث ہے،  131 چینی کمپنیاں پاکستان کی ترقی میں ہاتھ بڑھا رہی ہیں، پاکستان اور چین کی دوستی ہمالیہ سے بلند ہے۔

اپوزیشن سے متعلق سوال پر ان  کاکہناتھا کہ  اپوزیشن 10 سال پیچھے کی سوچ رکھتی ہےجبکہ عمران خان آگے کا سوچتا ہے ۔ پی ڈی ایم میں مزید طاقت نہیں ،ان کو الیکشن کی تیاری کرنی چاہیے، صرف مولانافضل الرحمان کو افغانستان کی صورتحال کا ادراک ہے لیکن پی ڈی ایم کے باقی کھلاڑی انڈر نائنٹین ہیں۔