لاہور : شہریوں کیلئے موبائل وین سے ویکسینیشن

مقامی میڈیا کے مطابق ضلعی انتظامیہ کی جانب سے بڑا اقدام ،  کورونا کے خلاف تحفظ فراہم کرنے والی و یکسین  شہر کے 5 ٹاؤنز میں لگانے کا آغاز کردیا گیا ، لاہور میں موبائل وین کے ذریعے شہریوں کو رجسٹرڈ کرنے کے ساتھ ساتھ ویکسین بھی لگائی جا رہی ہے۔لاہور کی ضلعی انتظامیہ کی جانب سے شہریوں کو ویکسینیٹیڈ کرنے کے لیے گھر گھر، علاقوں، مارکیٹوں میں کورونا موبائل وین چل رہی ہے جس کے ذریعے روزانہ 100 افراد کو ویکسین لگائی جاتی ہے۔ڈاکٹر کی موجودگی میں سہولتوں سے لیس موبائل وین میں موجود اسٹاف شہریوں کی رجسٹریشن اور بلڈ پریشر چیک کرنے کے بعد سائنو ویک لگاتا ہے۔

موبائل ویکسینیشن وین انتظامیہ کا کہنا ہے کہ 3 روز میں 3500 افراد کو ویکسین لگ چکی ہے۔ موبائل ویکسینیشن وین صبح 9 بجے سے شام 5 بجے تک سروس مہیا کرتی ہے، کورونا وائرس کی ویکسین کی پہلی اور دوسری ڈوز بھی شہریوں کو لگائی جاتی ہے، شہریوں نے اس حوالے سے موبائل سروس کو سراہا ہے۔موبائل انتظامیہ کا کہنا ہے کہ انہیں 10 ہزار افراد کو ویکسینیٹیڈ کرنے کا ٹارگٹ ملا ہے، شہریوں کے تعاون سے جلد ٹارگٹ مکمل کر لیں گے۔

خیال رہے کہ پنجاب میں  کورونا  وائرس کے  اب تک ایک ہزار 320 کیسز رپورٹ ہوچکے ہیں جبکہ  40 افراد جان کی بازی ہار چکے ہیں ۔

واضح رہے کہ ملک میں کورونا وائرس کی  چوتھی  لہر کے دوران  مزید 120 افراد انتقال کر گئے جبکہ 4ہزار 191 کیسز رپورٹ ہوئے ہیں۔  نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق  پاکستان میں اب تک 11 لاکھ 44 ہزار 341 کورونا کیسز رپورٹ ہوچکے ہیں جبکہ  مجموعی طور پر اب تک  25 ہزار 415 افراد انتقال کرچکے ہیں۔اس وقت ملک میں فعال کیسز کی تعداد 92 ہزار 844 ہےجبکہ مثبت  کیسزکی شرح6.83 رہی ۔