میں سینیٹ کا ممبر ہوں یا نہ ہوں میری آواز کو بند نہیں کر سکتے : پرویز رشید

سابق وزیر اطلاعات پرویز رشید نے میڈیا سے گفتگو میں کہا کہ پہلے پیسوں کے ذریعے خریدنے کی کوشش کی جاتی تھی ،لوگوں کو دباؤ کے ذریعے ووٹ حاصل کرنے کیلئے استعمال کیا جاتا تھا ،اب الیکشن کمیشن کو بھی اس میں فرقی بنا لیا گیا ہے ،میرے جیسے امیدوار جو کانٹے کی طرح چبھتے ہیں جن کی آواز فلور پر ان سے برداشت نہیں ہوتی ، ان کے خلاف سیاسی انجینئرنگ کی جاتی ہے۔ انجینئرنگ کے ذریعے مجھے باہر رکھنے کی کوشش کی جا رہی ہے ۔ 

انہوں نے کہا کہ میرے پر نام نہاد ڈیمانڈ کریئیٹ کی گئی ،جس کی مجھے کبھی اطلاع نہیں دی گئی تھی ،میں قانون تقاضے پورے کرنے کیلئے اور انتخاب میں جمع کرانے کیلئے تیار تھا ،مجھ سے مطالبہ کر رہے ہیں کہ میں ان کی کچھ رقم ادا کرنی ہے ،میں رقم ادا کرنے جاتا ہوں تو کوئی افسر سیٹ پر موجود نہیں ہوتا ،نہ بینک اکاؤنٹ نمبر دے رہے نہ کوئی کیش وصول کرنے کو تیار ہے۔ انہیں عمران خان کی طرف سے ہدایت ہے کہ یہ پیسے وصول نہ کریں تاکہ یہ مجھے حصہ لینے سے روک سکیں ۔ 

پرویز رشید کا مزید کہنا تھا کہ عمران خان کی جعلی حکومت جعلی مقدمات بنا کر لیگی رہنماؤں کو جیل میں رکھے ہوئے ہیں ،انہوں نے ایسی ہی ایک حرکت میرے ساتھ کی ہے ،میرا قانونی حق ہے کہ اس کیخلاف اپیل میں جاؤں گا اور ساری گزارشات پیش کروں گا ،ہم پارلیمنٹ سے باہر بھی اپنی آواز بلند کرتے ہیں ،میں سینیٹ کا ممبر ہوں یا نہ ہوں آپ سینیٹ کے دروازے میرے لیے بند کر دیں ،آپ میری آواز کو بند نہیں کر سکتے۔ 

واضح رہےکہ الیکشن کمیشن آف پاکستان نے مسلم لیگ ن کے رہنما پرویز رشید کے سینیٹ انتخابات کے لیے جمع کرائے گئے کاغذات نامزدگی مسترد کر دیے۔ پاکستان تحریک انصاف کے رانا مدثر نے پرویز رشید کے کاغذات نامزدگی چیلنج کیے تھے، جس میں پی ٹی آئی نے پنجاب ہاؤس کے واجبات ادا نہ کرنے کا اعتراض اٹھایا تھا، تاہم الیکشن کمیشن نے پی ٹی آئی کی جانب سے پرویز رشید کے کاغذات نامزدگی پر اعتراضات کو درست قرار دیتے ہوئے ان کے کاغذات نامزدگی مسترد کردئیے ہیں۔