کے ٹو پرلاپتہ کوہ پیما اب اس دنیا میں نہیں رہے، صوبائی وزیر سیاحت کی تصدیق

اسکردو میں صوبائی وزیر سیاحت راجہ ناصر علیخان نے پریس کانفرنس کرتے ہوئے  کہا کہ حکومت قومی ہیرو محمد علی سدپارہ کی خدمات کو خراج عقیدت پیش کرتی ہے ، حکومت علی سدپارہ کی فیملی کی مالی و اخلاقی معاونت کرے گی۔علی سدپارہ کے نام سے کوہ پیمائی کےلئے سکول قائم کیا جائے گا۔ قومی ہیرو کے بچوں کو تعلیمی سکالرز شپ دی جائے گی جبکہ وفاقی حکومت کو سکردو ائیر پورٹ کو محمد علی سدپارہ سے منسوب کرنے کی تجویز پیش کی گئی ہے۔  صوبائی وزیر نے کہا کہ حادثات کا شکار ہونے والے کوہ پیماؤں کے خاندانوں کی کفالت کےلئے باقاعدہ قانون بنایا جائے گا۔

علی سدپارہ کے بیٹے ساجد  سدپارہ  نے پریس کانفرنس کرتے ہوئے  بتایا کہ علی سدپارہ اپنے دو غیر ملکی ساتھیوں کے ہمراہ کے ٹو کی مہم جوئی کے دوران لاپتہ ہوئے، مجھے اور کئی انٹرنیشنل کوہ پیماوں کو یقین ہے کہ انھیں کے ٹو سر کرنے کے بعد واپسی پر حادثہ پیش آیا، میرا خاندان، پوری پاکستانی قوم اور ہمارے کوہ پیما دوست مسلسل صدمے اور تکلیف کے مرحلے سے گزر رہے ہیں۔     ساجد سدپارہ نے کہاکہ پاکستانی قوم کی محبت میرے خاندان کے لیے انتہائی حوصلے اور ہمت کا باعث بنا،  میرا خاندان انتہائی شفیق باپ سے محروم ہوا ہے،  پاکستانی قوم سبز ہلالی پرچم سے جنون کی حد تک محبت کرنے والے محب وطن قومی ہیرو سے محروم ہوئی ہے ۔ دنیا ایک بہادر اور با صلاحیت مہم جو سے محروم ہوئی ہے،دکھ اور غم کی اس گھڑی میں ہم سب ایک دوسرے کے لیے سہارا بنیں گے،  میں اپنے والد کے مشین کو جاری رکھوں گا اور ان کے ادھورے خواب پورے کروں گا۔ علی سدپارہ نے انتھک محنت، بہادری اور ہنرمندی سے 8 ہزار سے بلند 8 چوٹیاں سر کیں، ننگا پربت کو پہلی بار سردیوں میں سر کر کے ورلڈ ریکارڈ بنایا۔ ننگا پربت کو چاروں موسموں میں سر کرنے کا بھی ریکارڈ ہے۔ دنیا بھر کے کوہ پیماوں نے شاندار الفاظ میں انھیں خراج عقیدت پیش کیا ہے۔

ساجد سدپارہ نے مزید کہا کہ جس بلندی پر حادثہ ہوا تھا وہاں  چند گھنٹوں سے زیادہ زندہ رہنا ممکن نہیں تھا،   سرچ اینڈ ریسکیو آپریشن میں تمام دستیاب وسائل استعمال کئے گئے، اس طویل ریسکیو آپریشن میں جدید ٹیکنالوجی استعمال کی گئی۔  ساجد سد پارہ نے وزیر اعظم عمران خان اور پاک فوج کے سربراہ جنرل قمر جاوید باجوہ ،  عسکری ایوی ایشن سکردو کے بہادر پائلٹس  اور  ورچوئل اینڈ فزیکل بیس کیمپ ٹیم کا  شکریہ اداکیا ۔    

یاد رہے کہ دنیا کے دوسرے بلند ترین پہاڑ کے -ٹو کو سردیوں میں سر کرنے کی مہم پر جانے والے پاکستانی کوہ پیما محمد علی سد پارہ اور دیگر دو کوہ پیماؤں کو لاپتہ ہوئے 10 دن سے زائد ہوچکے  ہیں۔  لاپتہ  کوہ پیماؤں کی تلاش کے لیے پاک آرمی اور دیگر بین الاقوامی اداروں کی جانب سے کیے جانے والے سرچ آپریشن میں کوئی سراغ نہ مل سکا۔