حیدرعلی کی کامیابی پر قوم کو ناز ہے : عثمان بزدار

تفصیلات کے مطابق وزیراعلی پنجاب عثمان بزدار نے ٹوکیو پیرالمپکس میں تاریخ رقم کرنے والے پاکستانی کھلاڑی حیدر علی سے متعلق کہا ہے کہ حیدر علی  کی کامیابی پر قوم کو ناز ہے ۔ انہوں نے کہا کہ حیدر علی نے سونے کا تمغہ جیت کر پاکستان کا نام روشن کیا ہے اور اپنی محنت اور پیشہ ورانہ مہارت سے سبز ہلالی پرچم کو بلند کیا۔

انہوں نے کہاکہ حیدر علی نے قوم کا سرفخر سے بلند کیاہے۔ حیدر علی نے ا پنی عمدہ کارکردگی سے ثابت کیاہے کہ پاکستانی کھلاڑی صلاحیتوں میں کسی سے کم نہیں ،دعا گو ہوں کہ اللہ تعالیٰ حیدر علی کوآئندہ بھی کامیابیوں سے ہمکنار کرے۔

واضح رہے کہ پاکستان کے حیدر علی نے ٹوکیو پیرالمپکس میں تاریخ رقم کر دی ہے، حیدر علی پاکستان کے لیے پیرالمپکس میں گولڈ میڈل جیتنے والے پہلے پاکستانی بن گئے ہیں۔حیدر علی نے ٹوکیو پیرالمپکس میں مردوں کے ڈسکس تھرو مقابلے میں شرکت کی تھی، حیدرعلی نے پانچویں باری میں 55 اعشاریہ 26 میٹر کی کامیاب تھرو کی۔