کوروناکیسز میں اضافہ، لاہورکے مزید علاقوں میں سمارٹ لاک ڈاؤن نافذ

تفصیلات کے مطابق سیکرٹری پرائمری اینڈ سیکنڈری ہیلتھ کیئر  کے مطابق   لاہور  میں  زیادہ کورونا ٹیسٹ مثبت آنے والوں علاقوں میں سمارٹ لاک ڈاؤن لگایا جا رہا ہے۔ لاہور میں مکان نمبر705Fسے717F جوہر ٹاؤن ، گلی نمبر 21بلاک Sفیز2ڈی ایچ اے  ، مکان نمبر18سے20آصف بلاک علامہ اقبال ٹاؤن میں سمارٹ لاک ڈاؤن لگا دیا گیا ۔ مکان نمبر 390سے393بلاک Aگلشن راوی،L29بلاک Cسروس کوارٹر نزد UETمکان نمبر56سے 66تک ،باجوہ ہاؤس سٹریٹ نزد گول باغ، شاد باغ اور خالق سٹریٹ سلطان محمود روڈپر گلی نمبر 7 میں سمارٹ لاک ڈاؤن نافذ کر دیا گیا۔

سیکرٹری پرائمری اینڈ سیکنڈری ہیلتھ کیئر  کے مطابق لاک ڈاؤن والے علاقوں میں تمام شاپنگ مالز، ریسٹورنٹس، دفاتر(نجی اور سرکاری)بند رہیں گے۔ علاقہ مکینوں کی نقل و حمل محدود ہو گی،انتہائی ضرورت کے پیش نظر ایک فرد ایک سواری استعمال کر سکے گا۔ ہر قسم کے اجتماعات پر مکمل پابندی ہو گی۔ تمام میڈیکل سروسز، فارمیسی، میڈیکل سٹور،لیبارٹریاں،کولیکشن پوائنٹس،ہسپتال اور کلینکس 24 گھنٹے کھلے رہیں گے۔ ملک شاپس،چکن اور گوشت/مچھلی کی شاپس اور بیکریاں صبح 7سے شام 7بجے تک کھلی رہیں گی۔  گروسری سٹورز،جنرل سٹورز،آٹا چکیاں،فروٹ،سبزی کی دوکانیں، تندور اور پیڑول پمپس 9بجے سے شام 7بجے کھل سکیں گی۔

سیکرٹری پرائمری اینڈ سیکنڈری ہیلتھ کیئر  کے مطابق  سمارٹ لاک ڈاؤن کا مقصد کورونا سے زیادہ متاثر ہونے والے علاقوں سے لوگوں کی آمدورفت کو محدود کرنا ہے۔ متاثر ہ علاقوں میں سمارٹ لاک ڈاؤن سے ہی کورونا سے زیادہ لوگوں کو متاثر ہونے کے خطرے سے بچا یا جا سکتاہے۔ احتیاط نہ کرنے سے کورونا وائرس دوبارہ تیزی سے پھیل سکتا ہے  اور  پہلے سے زیادہ احتیاط کر کے ہی اس موذی بیماری دوبارہ پھیلاؤ سے بچا جا سکتا ہے۔

واضح رہے کہ نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق گزشتہ 24 گھنٹوں میں کورونا سے مزید36افراد چل بسے جس کے بعد اموات کی مجموعی تعداد12 ہزار563ہوگئی ہےجبکہ اب تک کورونا کے5 لاکھ 69 ہزار 846 کیسزرپورٹ ہوچکے ہیں ۔۔  پنجاب میں کورونا مریضوں کی تعداد ایک لاکھ 66 ہزار 777 ہوگئی ۔ جبکہ صوبے میں اب تک 5 ہزار185 افراد جان سے ہاتھ دھو بیٹھے ہیں ۔