الیکشن کمیشن نے فواد چودھری اور اعظم سواتی کو نوٹس جاری کردیے

تفصیلات کے مطابق الیکشن کمیشن آف پاکستان (ای سی پی ) نے وفاقی وزیر فواد چودھری اور اعظم سواتی کو نوٹس جاری کردیے۔دونوں کو نوٹس جاری کرنے کا فیصلہ الیکشن کمیشن کے ہنگامی اجلاس میں کیا گیا ۔اجلاس میں  پیمرا کی جانب سے موصول ہونے والے  ویڈیو کلپس ،ایوان صدر اجلاس اور سینیٹ کی قائمہ کمیٹی میں الزام تراشی کے ڈرافٹ کا جائزہ بھی لیا گیا۔الیکشن کمیشن نے وزراسے سات روزمیں جواب مانگا ہے۔

الیکشن کمیشن نے الزامات کے جائزےکیلئے  دو روز قبل پیمرا سے ویڈیو کلپس طلب کئے تھے اور حکام کو متعلقہ ریکارڈ مرتب کرنے کی ہدایت بھی کی تھی ۔

چند روز قبل  الیکشن کمیشن  آف پاکستان (ای سی پی )کا  اہم اجلاس ہوا  تھا، جس کی  صدارت سکندر سلطان راجہ چیف الیکشن کمشنر آف پاکستان  نے  کی ۔اس اجلاس میں ممبران الیکشن کمیشن  جناب نثار احمد درانی ، اور شاہ محمد جتوئی  کے علاوہ  الیکشن کمیشن  کے سینئر افسران  شریک ہوئے اور   الیکشن کمیشن  اور چیف الیکشن کمشنر  پر لگائےگئے  الزامات  کو زیر بحث  لایا گیا تھا ۔ الیکشن کمیشن  نے  ان الزامات  کی پُرزور  الفاظ میں  تردید   کی اور انہیں مسترد کردیا   تھا۔