امریکی پارلیمنٹ پر ایک بار پھر حملے کا خدشہ

امریکی پارلیمنٹ پر ایک بار پھر حملے کا خدشہ پیدا ہوگیاہے۔کیپیٹل ہل کی عمارت کے باہر دوبارہ باڑیں لگادی گئیں ہیں۔نیشنل گارڈز کو بھی تیاررہنے کی ہدایت کردی گئی ہے۔

غیر ملکی خبر رساں ادارے کے مطابق  18ستمبر کو کیپیٹل ہل کی عمارت کے سامنے بڑے پیمانے پر مظاہرے کا امکان ہے۔شہریوں کی  بڑی تعداد چھ جنوری کو امریکی پارلیمنٹ پر ہونیوالے حملے میں ملوث 6سو افراد کی گرفتاری اور ان پر عائد کردہ فرد کیخلاف احتجاج کرےگی۔

کیپیٹل ہل کی عمارت کےگرد دوبارہ باڑیں لگانے کا کام گزشتہ روز شروع کیاگیاتھا اور اب تک یہ کام کافی حد تک مکمل ہوچکاہے۔

پولیس کاکہناہےکہ ضرورت پڑنے پر سکیورٹی کیلئے نیشنل گارڈز کی مدد لی جائے گی۔۔انہیں تیار رہنے کا کہہ دیاگیاہے۔

یاد رہے کہ 6 جنوری کو واشنگٹن ڈی سی میں اس وقت کے صدر ڈونلڈ ٹرمپ کے حامیوں نے امریکی صدارتی انتخاب کے نتائج میں تبدیلی اور منتخب صدر جو بائیڈن کی جگہ ڈونلڈ ٹرمپ کو برقرار رکھنے کی کوشش میں کیپیٹل ہل کی عمارت پر دھاوا بول دیا تھا اور پرتشدد واقعات کے نتیجے میں 4 افراد ہلاک ہوئے تھے۔