آرمی چیف  کا گورنمنٹ کالج یونیورسٹی لاہور کا دورہ، گریجویٹس کو اسناد اور میڈلز سے نوازا

پاک فوج کے شعبہ تعلقات عامہ (آئی ایس پی آر ) کے مطابق  آرمی چیف جنرل قمر جاوید باجوہ  نے گورنمنٹ کالج یونیورسٹی لاہور کا دورہ کیا، آرمی چیف  نے جامعہ کے کانووکیشن میں بحیثیت مہمان خصوصی شرکت کی،یونیورسٹی کے چانسلر گورنر پنجاب چوھدری محمد سرور بھی موجود تھے۔

 آئی ایس پی آر کا کہنا ہے کہ  آرمی چیف نے گریجویٹس کو اسناد اور میڈلز سے نوازا،آرمی چیف نے نوجوانوں کی صلاحیتوں کو نکھارنے میں جامعہ کے اساتذہ، انتظامیہ کے کردار کو سراہا۔

آرمی چیف جنرل قمر جاوید باجوہ نے کہا کہ  گورنمنٹ کالج یونیورسٹی، پاکستانی تعلیمی اداروں کے تاج میں نگینہ ہے، جامعہ نے ہمیشہ بین الاقوامی شہرت کے حامل استعاروں کی تیاری میں کلیدی کردار ادا کیا، یونیورسٹی کے گریجویٹس نے اپنے اپنے شعبوں میں نمایاں کردار ادا کیا۔انہوں نے مزید کہا کہ نوجوان ہمیشہ اپنے مقاصد بلند رکھیں، نوجوان قائد کے وژن کے مطابق جہد مسلسل اور وقار کے ساتھ بلندیوں کے لیے سرگرم رہیں۔