کیپیٹل ہل پر ٹرمپ کے حامیوں کے دوبارہ حملے کا خدشہ، ریلی سے پہلے سکیورٹی ہائی الرٹ

تفصیلات کے مطابق واشنگٹن میں ٹرمپ کے حامیوں کی ریلی شروع ہونے سے پہلے سکیورٹی ہائی الرٹ ہے ۔ پولیس اور قانون نافذ کرنے والے اداروں کے اہلکار  حفاظتی لباس  پہنے  ڈنڈوں اور پستولوں سے مسلح  آہنی باڑ کے گرد حصار بنائے کھڑے ہیں ۔  کئی مقامات پر گلیوں کو ٹرک کھڑے کر کے بند کر دیا گیا ہے ۔

  میونسپل بسوں میں قانون نافذ کرنے والے اداروں کے اہلکاروں کو بھر کر  مختلف  مقامات پر پہنچایا جا رہا ہے ۔  ایک پولیس افسر نے کہا کہ چھ جنوری کو ہمیں شبہ تھا کہ کچھ ہونے جا رہا ہے آج کی ریلی سے پہلے ہمیں یقین ہے کہ صورت حال  پہلے  سے  زیادہ سنگین ہو سکتی ہے ۔

 اس ریلی کے دوران کانگریس کا کوئی اجلاس نہیں ہو رہا اور ارکان کی اکثریت شہر سے باہر ہے اس لیے ان کی سکیورٹی مسئلہ نہیں،۔ٹرمپ کے حامی چھ جنوری کو ہونے والے حملے کے ملزموں کےحق میں ریلی نکال رہے ہیں ۔

یاد رہے کہ 6 جنوری کو واشنگٹن ڈی سی میں اس وقت کے صدر ڈونلڈ ٹرمپ کے حامیوں نے امریکی صدارتی انتخاب کے نتائج میں تبدیلی اور منتخب صدر جو بائیڈن کی جگہ ڈونلڈ ٹرمپ کو برقرار رکھنے کی کوشش میں کیپیٹل ہل کی عمارت پر دھاوا بول دیا تھا اور پرتشدد واقعات کے نتیجے میں 4 افراد ہلاک ہوئے تھے۔