سیف علی خان اور کرینہ کپور خان کے ہاں دوسرے بیٹے کی پیدائش

بھارتی میڈیا کی رپورٹ کے مطابق کرینہ کپور کو گزشتہ رات ممبئی کے برج کینڈی اسپتال میں داخل کیا گیا تھا جہاں انہوں نے تقریباً 8 بجے دوسرے بچے کو جنم دیا۔اس سے قبل ان کا ایک بڑا بیٹا تیمورعلی خان ہے جس کی عمر اس وقت 4 سال ہے۔تیمور علی خان 2016میں اپنی پیدائش کے بعد سے ہی بھارت کا مقبول ترین بچہ بن گیا تھا۔

دوسری جانب بالی ووڈ کے سینئر اداکار اور کرینہ کپور کے والد رندھیر کپور نے کہا ہے کہ میں ایک بار پھر سے نانا بننے پر بہت خوشی محسوس کررہا ہوں۔بیٹے کی پیدائش سے ناصرف سیف اور میری بیٹی خوش ہیں بلکہ تیمور بھی بڑا بھائی بن کر بہت خوش ہوگیا ہے۔‘بھارتی میڈیا سے گفتگو کرتے ہوئے رندھیر کپور نے کہا کہ ’میں نے ابھی تک اپنے نواسے کو دیکھا نہیں ہے لیکن میری کرینہ سے فون پر بات ہوئی ہے۔‘’کرینہ نے بتایا ہے بچہ صحت مند ہے جبکہ وہ خود بھی بالکل ٹھیک ہے۔‘

یاد رہے کہ کرینہ کپور اور سیف علی خان سال 2012 میں رشتۂ ازدواج میں منسلک ہوئے تھے۔کرینہ کپور اور سیف علی خان کے ہاں پہلے بچے کی ولادت 20 دسمبر 2016 میں ہوئی تھی جبکہ اس معروف فلمی جوڑے نے دوسرے بچے کے حوالے سے کرینہ کے امید سے ہونے کا اعلان گرشتہ برس اگست میں کیا تھا۔