ڈینگی کا سب سے زیادہ خطرہ لاہور میں ہے:ڈاکٹر یاسمین راشد

تفصیلات کے مطابق ڈاکٹر یاسمین راشد کا کہنا ہے کہ 71 ہزارگھروں میں ڈینگی لاروا کے ثبوت ملے ہیں، ڈی ایچ اے میں ڈینگی مریضوں کی تعداد زیادہ ہے اور بارش کے دنوں میں ڈینگی لاروا پنپنے کے خطرات زیادہ ہیں۔

انہوں نے کہا ہے کہ ڈینگی کی تشخیص کیلئے سرکاری اسپتالوں میں الگ کاؤنٹر بنائے گئے ہیں۔

ان کا کہنا تھا کہ گزشتہ 24 گھنٹوں کے دوران پنجاب بھر سے ڈینگی کے 181 کیس رپورٹ ہوئے اور ان میں سے 131 کیسز صرف لاہور سے رپورٹ ہوئے۔

ڈاکٹر یاسمین راشد کا کہنا تھا کہ لاہور میں 1603 کیس رپورٹ ہوئے ہیں اس کے بعد راولپنڈی میں 208 ، اٹک میں 20 اور سرگودھا میں 15 کیسز رپوٹ ہوئے ہیں۔

وزیر صحت کا کہنا تھا کہ موسم میں تبدیلی کی وجہ سے گزشتہ 45 دنوں میں ڈینگی کے کیسز میں اضافہ دیکھا گیا ہے۔

ان کا کہنا تھا کہ پنجاب کے ہسپتال بیک وقت ڈینگی اور کوویڈ 19 کے مریضوں کی دیکھ بھال کر رہے ہیں، پنجاب کے اعلی انحصاری یونٹوں میں بستروں میں اضافہ کیا گیا ہے۔

ان کا مزید کہنا تھا کہ لاہور کے سرکاری ہسپتالوں میں ڈینگی کے مریضوں کے لیے 530 بستر اور ایچ ڈی یو میں 138 بستر مخصوص کیے گئے ہیں۔