ملک بھر میں ہفتہ وار ایک روز کی بندش ختم ، این سی او سی 

تفصیلات کے مطابق  نیشنل کمانڈ اینڈ آپریشن سینٹر (این سی او سی )کا اجلاس  سربراہ این سی او سی  اسد عمر کی زیر صدارت ہوا،  جس میں  اضلاع کی مکمل ویکسینیشن کی سطح کے تناسب میں ملک میں بیماری کی صورتحال کا تفصیلی جائزہ لیا گیا۔ 

این سی او سی کا کہنا ہے کہ  کم بیماری کے پھیلاؤ اور جاری ویکسینیشن مہم کےتناظر میں فورم نے ملک بھر میں ہفتہ وار ایک دن کی لازمی بندش کو ختم کر دیا ہے، این پی آئیز کا نفاذ  16 سے 31 اکتوبر 21 تک جاری رہے گا۔ ان  ڈور شادی کی تقریبات میں شرکا کی تعداد کو 200سے بڑھا کر 300کر دیا گیا  جبکہ  آؤٹ  ڈور شادی کی تقریبات میں 400سے بڑھا کر 500افراد کو شرکت کی اجازت دے دی گئی ۔

این سی او سی کے مطابق  سینما اور مزارات کو بھی  مکمل ویکسین شدہ افراد کے لئیے کھول دیا گیا  ہے، 28 اکتوبر 21 کو این سی او سی میں کے اجلاس میں موجودہ این پی آیئز پر نظر ثانی کی جائے گی۔

نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق  ملک میں کورونا وائرس کی  چوتھی  لہر کے دوران  گزشتہ چوبیس گھنٹے  میں  کورونا کے 1086 نئے کیسز سامنے  آئے  اور 27اموات کی تصدیق ہوئی۔