سعودی حکومت نے چند ممالک کے لیے خصوصی ڈیجیٹل سروس کا آغازکردیا

ریاض: سعودی حکومت نے چند ممالک کے لیے خصوصی ڈیجیٹل سروس کا آغاز کیا ہے جس کے ذریعے مملکت کے ویزے کے حصول میں آسانی ہوگی۔

سعودی معاون وزیرداخلہ برائے تکنیکی امور شہزادہ بندر بن عبداللہ کا کہنا ہے کہ سعودی عرب کے ویزے کیلئے فنگر پرنٹس، آئی اسکیننگ اور چہرے کی شناخت کا عمل اسمارٹ فونز کے ذریعے کیے جانے کی سہولت کا آغاز کیا گیا ہے، یہ اقدام ابتدائی طور پر چند ممالک کے لیے ہے، غیرملکیوں کو ویزے کے حصول میں پریشانیاں پیش نہیں آئیں گی۔

سعودی وزیر نے بتایا کہ آئندہ ماہ نئی ڈیجیٹل سروسز کا بھی آغاز کیا جارہا ہے جس کے ذریعے مائیکرو چیپ والے سعودی پاسپورٹ بنائے جائیں گے۔

ان کا کہنا تھا کہ نئے سعودی پاسپورٹس میں لگی چپ میں پاسپورٹ ہولڈر کا مکمل ڈیٹا فیڈ ہوگا جسے ایئرپورٹ پر موجود الیکٹرانک سکرینز کے ذریعے ریڈ کیا جاسکے گا، وزارت داخلہ خدمات کو بہتر بنانے کے لیے کوشاں ہے۔

بندر بن عبداللہ نے کہا کہ اسمارٹ فونز کے ذریعے ویزا درخواست گزار کا ڈیٹا جمع کرنے کی سہولت سے ویزا حاصل کرنے والوں کو کافی آسانی ہوگی، وہ گھر بیٹے یہ مراحل طے کرسکتے ہیں۔

قبل ازیں درخواست گزار کو مقررہ دفتر میں جا کرڈیٹا فیڈ کرانا ہوتا تھا۔ ابتدائی طور پر یہ سروس چند ممالک کے لیے تجرباتی بنیادوں پرجاری کی گئی ہے بعد ازاں مرحلہ وار تمام ممالک کے لیے شروع کی جائے گی۔ اس سروس کے ذریعے عمرہ ، حج ، وزٹ یا ورک ویزے بھی حاصل کیے جاسکتے ہیں۔