کشمیری آج یوم سیاہ منائیں گے، مقبوضہ کشمیر میں مکمل ہڑتال ہوگی

تفصیلات کے مطابق  27اکتوبر1947مقبوضہ جموں و کشمیر کی تاریخ کا سیاہ ترین دِن ہے۔ وادی میں مکمل ہڑتال کا اعلان کیا گیا ہے۔ جس کا مقصد عالمی برادری کو یہ باور کرانا ہے کہ بھارت نے کشمیریوں کی خواہشات کے برخلاف جموں وکشمیر پر قبضہ کر رکھا ہے اور انہیں ا ن کے  ناقابل تنسیخ حق، حق خودارادیت سے مسلسل انکار کر رہا ہے ۔

اس دن بھارت نےاپنی غاصب فوج کووادی میں اُتارا تھا۔ ریاستی دہشت گردی کے74سال  بعد بھی ہندوستان آج تک غاصبانہ طرزِعمل  پرکاربند ہے۔ ہندو انتہا پسند بی جے پی کشمیری مسلمانوں کی نسل کشی پر تلی ہوئی ہے۔ اس کا واضح ثبوت واچ جینو سائیڈ نے دُنیا کے سامنے پیش کیا۔مقبوضہ کشمیر کی مقامی قیادت بھی ان کالے اقدامات کے خلاف سراپا احتجاج ہے۔ بھارت اب تک ایک لاکھ سے زائد کشمیریوں کا قتلِ عام کر چکا ہے۔

اس موقع پر مکمل ہڑتال اور لال چوک سرینگر کی طرف مارچ کیا جائے گا جبکہ دنیا بھر کے دارلحکومتوں میں احتجاجی ریلیاں نکالی جائیں گی ۔ ہڑتال کی کال کل جماعتی حریت کانفرنس، میر واعظ عمر فاروق کی سرپرستی میں قائم حریت فورم اور دیگر آزادی پسند تنظیموں نے دی ہے ۔

رواں سال یوم سیاہ منانے کا مقصد عالمی برادری کی توجہ مقبوضہ کشمیر میں مودی کی فسطائی بھارتی حکومت کی طرف سے 5 اگست 2019سے مسلط کردہ فوجی محاصرے کی وجہ سے کشمیری عوام کو درپیش شدید مشکلات کی طرف مبذول کرانا بھی ہے۔