ملزم کو سڑنے کیلئے جیل میں نہیں رکھا جا سکتا: حمزہ شہباز کی ضمانت کا تحریری فیصلہ جاری

تفصیلات کے مطابق لاہور ہائیکورٹ کے جسٹس سرفراز ڈوگر کی سربراہی میں دو رکنی بنچ نے حمزہ شہباز کی ضمانت منظوری کا تحریری فیصلہ جاری کر دیا. بنچ نے باور کرایا کہ ملزم کو استغاثہ کے رحم و کرم پر نہیں چھوڑا جا سکتا. احتساب عدالت کی کارروائی ظاہر کرتی ہے کہ ملزم عدالت میں باقاعدگی سے پیش ہو رہے ہیں . اگر وکلا  پیش نہ ہوں تو اسکا قصوروار ملزم نہیں۔ 

لاہور ہائیکورٹ نے فیصلے میں قرار دیا کہ ریفرنس میں حمزہ شہباز مرکزی ملزم نہیں شہباز شریف ہیں جو سلاخوں کے پیچھے ہیں. اس لئےحمزہ شہباز کو جیل میں رکھنے کا کوئی غیر معمولی جواز نہیں۔ ضمانت منظور کرنے کے فیصلے میں یہ بھی کہا گیاکہ ٹرائل مکمل ہونے میں غیر معمولی وقت لگنے کے نکتہ کو نظر انداز نہیں کیا جاسکتا اور ملزم کو سڑنے کیلئے جیل میں نہیں رکھا جا سکتا۔

لاہور ہائیکورٹ نے ایک، ایک کروڑ کے دو مچلکوں کے عوض حمزہ شہباز کو رہا کرنے کا حکم  دیا. احتساب عدالت کے ڈیوٹی جج اکمل خان ضمانتی مچلکوں کی جانچ پڑتال کریں گے جس کے بعد روبکارجاری ہوگی۔