ہفتہ وار رپورٹ جاری،مہنگائی میں ہوشربا اضافہ

ادارہ شماریات کی جانب سے جاری کی گئی ہفتہ وار مہنگائی کی رپورٹ کے مطابق ملک میں مہنگائی کا  راج ہے اور اشیاء خوردونوش کی قیمتوں میں ہوشربا اضافہ ہوا ہے،حالیہ ہفتے میں مہنگائی کی شرح میں 2 اعشاریہ 41 فیصد اضافہ ہوا ہے جس کے بعد مہنگائی کی مجموعی شرح 13 اعشاریہ 89 فیصد کی سطح پر پہنچ گئی، ایک ہفتے کے دوران 25 اشیاء کی قیمتوں میں اضافہ 5 میں کمی ریکارڈ کی گئی ہے،رواں ہفتے مرغی کا گوشت،انڈے،گھی اور دالوں کی قیمتیں بڑھ گئیں،ایک ہفتے کے دوران مرغی کا گوشت 5 روپے فی کلو مہنگا ہو گیا،مرغی کی فی کلو قیمت 225 روپے سے بڑھ کر 250 روپے تک پہنچ گئی،ایک ہفتے میں ڈالڈا گھی کا اڑھائی کلو ٹن 8 روپے مہنگا ہو گیا جبکہ رواں ہفتے دال چنا تین روپے فی کلو مہنگی ہو گئی، بیس کلو آٹے کا تھیلا پانچ روپے مہنگا ہو گیا اور بیس کلو آٹے کا تھیلا 950 روپے سے بڑھ کر 955 روپے کا ہو گیا۔

رپورٹ میں مزید کہا گیا کہ ایک ہفتے کے دوران 21 اشیاء کی قیمتوں میں استحکام ریکارڈ کیا گیا جبکہ حالیہ ہفتے ٹماٹر دو روپے، پیاز ایک روپیہ، گڑ بیس پیسے فی کلو سستا ہوا۔