جرمنی میں روسی سفارتی اہلکار سفارت خانے کے باہر مردہ پائے گئے

نیوز میگزین  ڈیر اسپیگل کے مطابق اس شخص کی لاش 19 اکتوبر کو برلن کے احاطے کی حفاظت پر مامور پولیس کو فرش پر ملی۔انہوں نے کہا کہ  یہ شخص بظاہر اوپری منزل سے گرا تھا، لیکن یہ واضح نہیں کہ کیسے۔

جرمنی کی وزارت خارجہ نے صحافیوں کو سفارت کار کی موت کی تصدیق کی لیکن مزید تفصیلات نہیں بتائیں۔برلن میں پولیس نے اس موت پر عوامی طور پر کوئی تبصرہ نہیں کیا ہے۔

ڈیر اسپیگل نے کہا کہ سفارت خانے نے اسے ایک "افسوسناک حادثہ" قرار دیا ہے جس پر وہ "اخلاقی وجوہات کی بناء پر" کوئی تبصرہ نہیں کرے گا۔

سرکاری طور پر اس شخص کا نام ظاہر نہیں کیا گیا ہے لیکن رپورٹس کے مطابق اس کی عمر 35 سال تھی اور وہ روسی سفارت خانے کے سیکنڈ سیکرٹری کے طور پر درج تھے۔

تفتیشی ویب سائٹ بیلنگ کیٹ نے کہا کہ اس نے اوپن سورس ڈیٹا کا استعمال کرتے ہوئے یہ ثابت کیا کہ یہ شخص روس کی ایف ایس بی انٹیلی جنس ایجنسی کی سیکنڈ سروس کے ڈپٹی ڈائریکٹر کا بیٹا تھا۔

سیکنڈ سروس کے اہلکاروں کو 2020 میں روسی اپوزیشن شخصیت الیکسی ناوالنی کو زہر دینے سے بھی جوڑا گیا ہے۔

ڈیر اسپیگل کے مطابق، روسی سفارت خانے نے گزشتہ ماہ سفارتی اہلکار  کی موت کے بعد پوسٹ مارٹم کے معائنے پر اتفاق نہیں کیا تھا اور اب اس کی لاش روس کو واپس کر دی گئی ہے۔