'اسرائیل جنگ شروع کر سکتا ہے لیکن ہم اسے ختم کریں گے' 

غیر ملکی خبر رساں ادارے کے مطا بق ایران کے پاسداران انقلاب اسلامی کے ایک کمانڈر   نے اسرائیل کے ان دعوؤں کو رد کیا ہے کہ وہ مسلح تصادم کے لیے تیار ہیں۔ اس ہفتے کے شروع میں ایک اسرائیلی کمانڈر نے کہا تھا کہ ملک ایران کے ساتھ ممکنہ مسلح تصادم کی تیاری کر رہا ہے۔

اس کے جواب میں آئی آر جی سی ایرو اسپیس برانچ کے کمانڈر امیر علی حاجی زادہ نے کہا کہ اگر اسرائیل جنگ شروع کرتا ہے  تو ایران اسے ختم کرے گا۔ 

یہ جواب ایران، یورپ اور امریکہ کے ویانا میں دوبارہ شروع ہونے والے جوہری مذاکرات سے چند ہفتے قبل آیا ہے۔

اسرائیلی فوج کے چیف آف اسٹاف لیفٹیننٹ جنرل ایوب کوہاوی نے منگل کو کہا کہ اسرائیلی فوج "ایران اور جوہری فوجی خطرے سے نمٹنے کے لیے آپریشنل منصوبوں اور تیاریوں کو تیز کر رہی ہے"۔

اسرائیل طویل عرصے سے جوہری صلاحیت رکھنے والے ایران سے محتاط رہا ہے اور اس ملک اپنے لیے خطرہ سمجھتا ہے۔ اس نے متعدد مواقع پر کہا ہے کہ اگر ضرورت پڑی تو وہ فوجی طاقت کے ساتھ ایران کو جوہری ہتھیار بنانے سے روکنے کے لیے کارروائی کرے گی۔

اسرائیل ایران کے جوہری معاہدے سے امریکی دستبرداری کا ایک بڑا حامی تھا۔جوہری  معاہدے نے اس بات کو یقینی بنایا کہ ایران کی جوہری تنصیبات کی نگرانی اقوام متحدہ کے جوہری نگراں ادارے کے ذریعے کی جائے گی، گرچہ ایران نے اصرار کیا ہے کہ اس کا جوہری پروگرام صرف پرامن مقاصد کے لیے ہے، لیکن امریکہ کے معاہدے سے نکلنے کے بعد سے، ایران نے اپنی یورینیم کی پیداوار میں اضافہ کر دیا ہے اور IAEA کی اپنی نیٹنز سائٹ تک رسائی محدود کر دی ہے۔

ویانا میں ہونے والے مذاکرات سے پہلے، ایران امریکہ سے مطالبہ کر رہا ہے کہ وہ اس بات کو یقینی بنائے کہ وہ دوسرے جوہری معاہدے سے باہر نہیں نکلے گا اور اصرار کر رہا ہے کہ امریکہ ان پابندیوں کو اٹھا لے جو اس کی معیشت کو تباہ کر رہی ہیں۔