سعودیہ میں منشیات اسمگلنگ پر افغان شہری کو سزائے موت، وزارت داخلہ کا سخت پیغام

سعودی عرب کے مقدس شہر مکہ مکرمہ میں منشیات اسمگلنگ کے جرم میں تعلق افغان شہری کو سزائے موت دے دی گئی ہے۔

سعودی وزارتِ داخلہ کی جانب سے جاری کردہ بیان کے مطابق افغان شہری غلام رسول فقیر پر مملکت میں ہیروئن اسمگل کرنے کا الزام تھا۔ مجاز عدالت نے تمام شواہد اور قانونی تقاضے پورے ہونے کے بعد اسے سزائے موت سنائی، جس کی بعد ازاں سعودی سپریم کورٹ نے بھی توثیق کر دی۔

بیان میں بتایا گیا کہ مجرم کی جانب سے اپیل دائر کی گئی تھی، تاہم اعلیٰ عدلیہ نے ابتدائی فیصلے کو برقرار رکھا۔ آج ہفتہ کے روز مکہ مکرمہ میں عدالتی فیصلے پر عمل درآمد کرتے ہوئے مجرم کو سزائے موت دے دی گئی۔

سعودی وزارت داخلہ نے واضح الفاظ میں خبردار کیا ہے کہ مملکت میں منشیات کے جرائم کے خلاف "زیرو ٹالرنس" کی پالیسی نافذ ہے، اور ایسے سنگین جرائم میں ملوث افراد کو سخت ترین سزائیں دی جائیں گی۔

وزارت نے مزید کہا کہ ملک کے اندر منشیات کی اسمگلنگ، خرید و فروخت یا کسی بھی قسم کی معاونت پر قانون کے تحت سخت کارروائی کی جائے گی، اور مجرموں کو ان کے انجام تک پہنچایا جائے گا۔